Aktyor həbs oluna bilər

Məşhur komediya aktyoru Şahan Gökbakarın həbsi istənilib.

Buna səbəb aktyorun Marmarisdə yerləşən və 1-ci dərəcəli Təbii Mühafizə Bölgəsi kimi təsnif edilən villasına icazəsiz günəş panelləri və su çənləri tikməsi olub. Bununla bağlı Marmaris Respublika Baş Prokurorluğu tərəfindən iddianamə hazırlanıb.

İddianamədə Şahan Gökbakar, qardaşı Toqan Gökbakar, Çağrı Özeren və Osman Bayındıra “Mədəniyyət və təbii sərvətlərin mühafizəsi haqqında” qanunu pozaraq tikintini çirkləndirməkdə günahlandırılaraq 3 ildən 10 ilə qədər həbs cəzası istənilib.

Şahan Gökbakarın ortağı olduğu Çamaşırhane Film Yapım Anonim Şirkətinə məxsus villaların bina qeydiyyat sənədləri və əlavələri noyabrda Muğla İl Ətraf Mühit, Şəhərsalma və İqlim Dəyişikliyi Müdirliyinin Bina Qeydiyyat Sertifikatı Qiymətləndirmə Komissiyası tərəfindən ləğv edilib. Daha sonra icazəsiz fəaliyyətə görə villa sahiblərinə qarşı cinayət işi açılıb. Marmaris Bələdiyyəsinə də söküntü qərarlarının qəbul edilməsi və bina ilə əlaqədar olanlara söküntü bildirişləri göndərilməsi ilə bağlı xəbərdarlıq edilib.

Bu il sentyabrın 6-da Marmaris Bələdiyyəsinə göndərilən məktubla bir daha xatırladılıb ki, Komissiyanın ləğv qərarına qarşı açılan işlərdə heç bir ləğvetmə və ya icranın dayandırılması qərarı yoxdur. Bundan əlavə, Marmaris Bələdiyyəsinə söküntü prosedurlarına başlamaq üçün bir daha xəbərdarlıq edilib.

Məşhur komediya aktyoru villaya 10 milyon lirə ödəyib.