Vaqif Aydınoğlu: "Telejurnalistikaya sonradan gələn nəsil çox hazırlıqsızdır"

ATV-nin "Xəbərlər" departamntinin baş redaktoru və "Həftə sonu" analitik proqramın aparıcısı Vaqif Aydınoğlu ATV telekanalında yayımlanan "Kulis" verilişinin qonağı olub.

Muztv.az xəbər verir ki, xəbərə baxmağın onu hazırlamaqdan daha rahat olduğunu deyən aparıcı "Müəllif" rubrikasında maraqlı açıqlamlar edib:

"İşdə daha ciddi görünsəm də, kənarda bir az sakit olduğumu deyirlər. Dindirsələr, danışıram, dindirməsələr, susuram, müşahidə etməyi sevirəm. 15 ildir ki, bu sahədəyəm. İşim ciddi olduğundan artıq kənara da çıxanda bu məsuliyyət sanki üzərimizdə qalır".

Vaqif Aydınoğlu hazırkı aparıcıların peşəkarlıq səviyyəsindən də danışıb:

"Çox təəssüflər olsun ki, illər öncə bu sahəyə gələn insanlar işindən ikiəlli yapışardı, üzərində daha çox işləyərdi, heç vaxt heç nə ilə qane olmurduq, amma son illərdə televiziya sahəsinə gələnlər çox hazırlıqsızdırlar. Əgər sən jurnalistika sahəsindəsənsə, ən azından tələbə dövründən əlində qəzetlə gəzməlisən. İnternet dövründə yaşayırıq, xəbər portallarını izləməlidirlər. Problem ondadır ki, gənclərimiz internet dövrünü başqa şeylərə xərcləyirlər".

Bir qədər də xarakterindən danışan Aydınoğlu qapalı olduğunu deyib:

"Xarakter baxımından qapalı olmaqla özümü kimdənsə və ya nədənsə qorumuram. Sadəcə xarakterim belədir. Danışmağı yox, daha çox dinləməyi xoşlayıram.

Boş vaxtlarında mütaliə etməyi sevdiyini deyən aparıcı idmana meylli olduğunu da qeyd edib.