Aygün Bəylər əbədiyyətə qovuşdu...

Azərbaycan incəsənətinin gözündən bir damla yaş süzülüb qəlbimizə axdı. Əməkdar artist Aygün Bəylər 48 yaşında  həyatla vidalaşıb, əbədiyyətə qovuşdu.

Sənəti, sadəliyi, özünəməxsusluğu ilə sevgisini qazandığı insanların bu dəfə köksünə çarpaz dağ çəkdi təəssüf ki...

Bir neçə gün əvvəl konsert proqramı ilə çıxış edən sənət fədaisi bəlkə özü də bilmədən 13 yaşından bəri sözün əsl mənasında can qoyduğu peşəkar səhnə, musiqi və tamaşaçılara əlvida dedi.

Sənətkar adının ağırlığını, mahiyyətini layiqincə daşıdı Aygün Bəylər.  İslam Razayev, Ağaxan Abdullayev, Arif Babayev, Alim Qasımov kimi ustadların  tələbəsi idi.

Çox nəğmələrə ecazkar səsi ilə həyat verən sənətçi "Tut ağacı" ilə yaddaşlara həkk oldu. Bəlkə elə Tut ağacı onun ömrü idi. Könlünə, ömrünə Neçə çarpaz dağ çəkildiyini, neçə körpə budağının əzildiyini,  əlçatmaz arzularınının  necə  yarımçıq qaldığını söyləyirdi Tut ağacı Aygünün.

Bu dünyadan bir Aygün Bəylər keçdi. Səsi, zənguləsi, hətta zümzüməsi ilə də hələ uzun müddət yaşayacaq Aygün Bəylər.

Allah rəhmət etsin!