Xalq artistinin doğum günüdür

1987-ci ildən günümüzə qədər, sadəlövhlüyü ilə hərkəsin sevgisini qazanan, tək arzusu yadlaşmış qohumları biraraya gətirmək olan “Qafar”… Söhbət bu obraza həyat verən “Yaşıl eynəkli adam” tamaşasındaki “Şöhrət” ordenli, Xalq artisti Hacı İsmayılovdan gedir.

Bu gün aktyorun 80 yaşı tamam olur.

Ona böyük uğur qazandıran “Ad günü” filmi və “Həm ziyarət, həm ticarət” filmindəki “Mustafa” obrazını elə yaşayıb ki, bəzən elə onun özünə də Şəkili Mustafa deyirlər. 

Hacı İsmayılov 22 yanvar 1944-cü ildə Bakıda dünyaya göz açıb. Azərbaycan Dövlət Teatr İnstitunun məzunu olan aktyor, bir çox teatr və filmlərdə rol alıb. Bizlər onu “Bəyin oğurlanması” filmindəki “Tağı” kimi də tanıyırıq. 

Sənətkar Mirzə Fətəli Axundovun “Müsyö Jordan və Dərviş Məstəli şah” komediyasında dərviş Məstəli şah, Qarabağ müharibəsinə həsr olunan “Fəryad” filmində “Rövşən”, “Qayınana əməliyyatı” filmində “Həmid” və bir çox unudulmaz obrazları ilə xalqın sevgisini qazanıb. 

Hacı İsmayılov hazırda Azərbaycan Teatr Xadimləri ittifaqının yaradıcılıq üzrə sədr müavini vəzifəsində fəaliyyət göstərir. Ömrün uzun, canın sağlam, üzün daim gülsün dəyərli sənətkar!