Xocalı Ağrısı

1992-ci il. 26 Fevral. Xocalı. Həmin gecədən sonra Xocalı sakinləri uzun müddət bir araya gəlmədi. Ətrafa qonşuların qaynatdığı samovarın tüstüsü yayılmadı, Məhəllələrdən gülüş səsi eşidilmədi təəssüf ki…

Çünki, o gecə Ermənistan silahlı qüvvələri bəşəriyyət tarixinin ən ağır cinayətlərindən olan, Xocalı soyqrımını həyata keçirdi. İsti yuvalarında şirin yuxuda olan günahsız, əliyalın Xocalı əhalisi qarlı qış gecəsində xüsusi amansızlıqla qətl edildi. Evlərini tərk edib qaçmağa məcbur olan, “azad dəhlizlə”  hərəkət etməyə çalışan dinc insanlara belə aman verilmədi. 63-ü uşaq, 106-ı qadın, 70-i qoca olmaqla 613 nəfər qətlə yetirldi, 1275 nəfər əsir düşdü, 150 nəfərin taleyi isə indiyə qədər naməlum qaldı.Uzun illər qəlbimizdə dağ olan Xocalı ağrımıza göz yumuldu. Nə səsimizi duyan oldu nə də səsimizə səs verən… Amma illər keçdi, ağıl, güc və haqq birləşib bir yol oldu, Xocalıya aparan bir yol!

Qarın içində yalın ayaqla qaçan körpələr, silaha sarılıb geri qayıtdı. Ali Baş Komandan İlham Əliyevin uğurlu siyasəti və bu siyasət uğrunda tək ürək olan Azərbaycan övladları Xocalıya geri döndü! Nəhayət 2023-cü ili oktyabrın 15-də qalib sərkərdə bayrağımızı Xocalıda ucaltdı!

 Bu gün Xocalını həm ağrılı həm də qürurla anırıq! Faciə qurbanlarını hörmət və ehtiramla yad edirik!