Polşa kukla sənəti nümunələri fotosərgidə

Azərbaycan Dövlət Kukla Teatrında Polşa Respublikasının Bakıdakı Səfirliyinin teatrla birgə layihəsi olan “Polşanın kukla teatr sənəti” foto sərginin açılışı olub.

Mədəniyyət Nazirliyinin dəstəyi ilə baş tutan bu tədbirin təşkilində məqsəd iki ölkənin kukla teatrı sənətçilərini qiyabi də olsa tanış etmək, birgə yaradıcılıq əlaqələrinin yaranmasına zəmin yaratmaq olub. Sərginin açılışında Meksika, Slovakiya və Çilinin ölkəmizdəki fövqəladə və səlahiyyətli səfirləri, diplomatik korpuslarının təmsilçiləri də iştirak ediblər.

Qeyd edək ki, Polşa uzun və maraqlı kukla teatrı tarixinə malikdir. Burada ilk kukla tamaşalarının nümayiş tarixi XV əsrə aiddir. Belə ki, həmin vaxtlar kukla ifaçıları küçələrdə və şəhər meydanlarında tamaşalar göstərərək bütün ölkəni gəzirdilər.