Bu gün Ümumdünya Gülüş Günüdür

İnsanların həyatını gülüşsüz təsəvvür etmək mümkün deyil.

Hər il aprelin 1-i ənənəvi olaraq Ümumdünya Gülüş Günü kimi qeyd olunur.  

Aprelin 1-də bir-birini aldatmaq adətinin meydana gəlməsi haqda müxtəlif versiyalar var. Ən çox yayılmış versiyanın kökü gedib qədim Romaya çıxır. Bəzi söyləntilərə görə isə, Gülüş Günü 500 il əvvəl Fransada yaranıb. O vaxt fransızlar yeni ili məhz həmin gün qarşılayırdılar. Fransa kralı qərar verdi ki, yeni il yanvarın 1-də qeyd olunsun. Xalq kralın qərarından narazı qaldı. Camaat kralın adamlarını lağa qoyurdu. Onları qonaqlığa dəvət edir, özləri həmin yerə gəlmir, yalan xəbərlər yayırdılar. Amma kral qərarını dəyişmədi.

Aradan illər keçdi. Xalq yavaş-yavaş Yeni ili yanvarın 1-də qeyd etməyə öyrəşdi. Bununla belə, 1 apreli də unutmadılar. Həmin günkü zarafatları yada salıb 1 apreli Gülüş Günü kimi qeyd etməyi qərara aldılar. Tezliklə bu ənənə bütün dünyada o cümlədən Azərbaycanda yayıldı. Düzdür, bu gün hamı çalışır aldanmasın, amma yenə də aldananlar da olur.

Beləcə uzun əsrlərin keçməsindən sonra dünyanın bütün ölkələrində 1 aprel günündə öz dostlarına zarafat edib, gülən insanlara rast gəlmək mümkündür. Siz də bu gündə dost-tanışlarınızla zarafatlar edib, gülüb, əylənin.  Biz isə arzu edirik ki, üzündə gülüş yalnız 1 aprel yox, hər zaman olsun.