Gənc bəstəkarlarla bağlı Plenum başa çatıb
“Azərbaycan Bəstəkarlar İttifaqı-90” silsiləsindən gənc bəstəkarların yaradıcılığına dair Plenum öz işini yekunlaşdırıb.
Mayın 20-də Plenumun nəticələri ilə bağlı Azərbaycan Bəstəkarlar İttifaqında (ABİ) dəyirmi masa keçirilib.
Dəyirmi masa ətrafında toplaşan Bəstəkarlar ittifaqının rəhbərliyi, üzvləri, bəstəkar və musiqişünaslar, ifaçılar, eyni zamanda, musiqisevərlər əsası dahi Üzeyir Hacıbəyli tərəfindən qoyulan ənənələrin yaşadılmasından və Plenumun uğurlu nəticələrindən söhbət açıblar.
Bildirilib ki, Plenumun proqramına mayın 15-dən 20-dək keçirilən gənc bəstəkarların əsərlərindən ibarət kamera-instrumental əsərlər, elmi konfrans, simfonik musiqi və dəyirmi masada müzakirə daxil idi. Plenumun ilk günündə gənc bəstəkarların kamera-instrumental və vokal musiqisi səslənib. Proqram Vəfa Bağırzadə, Sevinc Əliyeva-Qəmbərova, Fərid Fətullayev, İlahə Qismət-Abdulla, Tural Məmmədli, Elvin Quliyevin əsərlərindən ibarət olub.
Mayın 17-də M.Maqomayev adına Azərbaycan Dövlət Akademik Filarmoniyasında Ü.Hacıbəyli adına Azərbaycan Dövlət Simfonik orkestrinin müşayiətində bədii rəhbər və baş dirijor, Əməkdar artist Fuad İbrahimovun rəhbərliyi ilə simfonik konsert keçirilib. Azərbaycan Bəstəkarlar İttifaqının sədri, Xalq artisti, professor Firəngiz Əlizadənin təşəbbüsü ilə bu möhtəşəm konsertə gənc bəstəkarların vətənpərvərlik mövzusunda irihəcmli əsərləri daxil edilib.
Konsertdə Tural Məmmədlinin “Şuşa fəthi”, Vüqar Məmmədzadənin “İnsan”, Elvin Quliyevin “Qayıdış”, Eldar Babayevin “Gələcəyi düşünərkən” simfonik poemaları, İlahə Qismət-Abdullanın “Zəfər yolu”, Fərid Fətullayevin “Dəstgah” simfonik orkestr üçün əsərləri səslənib. Bu əsərlərin hər biri müxtəlif təfəkkürün məhsulu olsa da, onları bədii cəhətdən birləşdirən bir ideya vardı ki, bu da vətənpərvərlik mövzusu idi. Təbii ki, gənc bəstəkarların belə bir mövzuya müraciət etməsinin başlıca səbəbi onların Vətənə məhəbbəti ilə yanaşı, 44 günlük Vətən müharibəsində xalqımızın əldə etdiyi şanlı Qələbədir. Bu əsərlərin səslənməsində dirijorun da çox böyük əməyi var. Belə ki, o, hər bir əsərin bədii məzmunu dərindən duyaraq onu bəstəkarın düşündüyü tərzdə və öz interpretatorluğu ilə təqdim edib.