Hacıbaba Bağırovun 92-ci ildönümüdür

Elə sənətkarlar var ki, onların ömürlərində bir dəfə yaratdığı obrazlar onları xatırlamağa bəs edir...

Azərbaycanın mərhum Xalq artisti Hacıbaba Bağırov isə demək olar ki, yaratdığı bütün obrazlarla yaddaşlara həkk olunub.

Unudulmaz sənətkarımız, Xalq artisti Hacıbaba Bağırovun anadan olmasının 92-ci ildönümü tamam olur.

Sənətkarın repertuarına daxil olan obrazlar komik çalarları sayəsində qısa müddətdə tanınıb sevilməyə başlayıb.

Üzeyir Hacıbəylinin “Arşın mal alan”ında Soltan bəy, “O olmasın, bu olsun”da Məşədi İbad, “Hardasan, ay subaylıq”da Novruzəli,  “Toy kimindir?”ində Uzun, “Bankir adaxlı”, “Sizinlə gülə-gülə”, “Bildirçinin bəyliyi”, “92 dəqiqə gülüş” trilogiyasında Sonqulu, “Məhəbbət oyunu”nda Nuruş, “On min dollarlıq keyf”də Fərzəli kimi tamaşaçıların dərin rəğbətini qazanmış rolları olub.

“Ulduz”da Möhsün, “Mehman”da Arif, “Onun bəlalı sevgisi”ndə Qaraxalov, “Alma-almaya bənzər”də Məmmədəli, “Şirbalanın məhəbbəti”ndə Şirbala rolları kino həvəskarları tərəfindən maraqla qarşılanıb.

Həyatla 74 yaşında vidalaşan  sənətkar adını Azərbaycan teatr sənətinə elə əbədi həkk edib ki, bu gün olduğun kimi, gələcəkdə də onun sənət yolu gənc sənətkarlar üçün bir məktəb olaraq qalacaq.