Sevil-Sevinc bacılarının avtomobillə vurduğu kişinin nəvəsi danışdı

Sevinc-Sevil bacılarının törətdiyi qəzada ağır yaralanan Söhrab Ağayevin nəvəsi babasının son durumu ilə bağlı açıqlama verib.
Muztv.az-ın məlumatına görə, xəstəxanada babasının yanında olan gənc bildirib ki, Söhrab Ağayev reanimasiyadadır və vəziyyəti ağır-stabildir. O qeyd edib ki, babası ötən gecə indi olduğu özəl klinikaya köçürülüb: “Kim istəyər ki, belə bir iş olsun. Babamın ölümünü yox, sağalmağını gözləyirik. Reanimasiyadan palataya köçürülməsi üçün çox tezdir”.
Söhrab Ağayevin nəvəsi deyib ki, müğənni bacılar xəstəxana xərcləri ilə bağlı onlara maddi yardım edirlər: “Bizim o qızlardan şikayət etmək fikrimiz yoxdur”.
Qeyd edək ki, yol qəzasında ağır xəsarət alan 87 yaşlı Söhrab Ağayev aprelin 5-də 1 saylı şəhər xəstəxanasına huşsuz vəziyyətdə gətirilib və bəlli olub ki, onun beyninin sağ yarımkürəsi tamamilə əzilib, beyninə qan sızıb. Yaralının həyatına təhlükə böyükdür.
Faktla bağlı araşdırma aparılır. Sevinc Səfərova polisə hadisə ilə bağlı izahat verib.