Meyxanaçının bacısı oğlu: “Yalan xəbər yazmasınlar, dayım sağ-salamatdır”.

Bir müddət əvvəl beyninə qan sızan və Mərkəzi Klinik Xəstəxananın reanimasiya şöbəsinə yerləşdirilən tanınmış meyxanaçı Ağakərim (Kərim Novruzov) artıq palataya köçürülüb.
Muztv.az lent.az-a istinadən xəbər verir ki, bu barədə meyxanaçının bacısı oğlu Rüstəm məlumat verib: “Dünən günortadan sonra onun səhhətində yaxşılaşma hiss olunub. Reanimasiyadan çıxardılıb, palataya köçürülüb. Özünü çox yaxşı hiss edir. Ayağa da qalxıb. Huşunu da itirməyib. Hamımızı tanıyır, söhbət edir”.
Ağakərimin bacısı oğlu dayısının yaxın günlərdə evə buraxılacağını da bildirib.
O, həmçinin bəzi saytların tiraj xətrinə yalan xəbərlər yazmasına da etiraz edib: “Səhərdən mənim də, dayımın da telefonu dayanmır. Yalan xəbər yazmasınlar, dayım sağ-salamatdır”.
Qeyd edək ki, bu gün bəzi KİV-lər meyxanaçı Ağakərimin dünyasını dəyişdiyi barədə məlumat yayıb.
Xatırladaq ki, meyxanaçı Ağakərimin martın 30-da beyninə qan sızıb.