TÜRKSOY-un Gənclər Orkestri Balkan turuna başlayıb

TÜRKSOY-un Gənclər Orkestri Balkan turuna başlayıb
Türk dünyasının müxtəlif ölkələrindən seçilmiş gənc istedadlardan ibarət TÜRKSOY Gənclər Orkestrinin Balkan turu başlayıb.

Muztv.az xəbər verir ki, Türkiyənin Ankara şəhərində bir araya gələrək 10 gün ərzində hazırlaşan Azərbaycan, Qazaxıstan, Qırğızıstan, Türkmənistan, Türkiyə, Rusiya Federasiyasının Başqırdıstan və Tatarıstan respublikalarının gənc sənətçiləri Balkan turu çərçivəsində ilk konsertlərini Makedoniyanın Üsküp şəhərində verib.

Konsertə Türkiyənin Makedoniyadakı səfiri Tülin Erkal Kara, TÜRKSOY-un baş katibi Düsen Kaseinov, Azərbaycanın Türkiyə və Makedoniyadakı səfiri Faiq Bağırov, türk qurum və təşkilatlarının nümayəndələri və yerli sakinlər qatılıb.

Türk respublikaları arasındakı diplomatik əlaqələrin 25 illiyinə həsr edilən konsertin açılışında çıxış edən Tülin Erkal Kara türk dünyasının UNESCO-su adlandırılan TÜRKSOY-un yarandığı gündən bu günədək gerçəkləşdirdiyi tədbirlərlə türk xalqlarının qardaşlığını gücləndirmək, türk mədəniyyətini dünyaya tanıtmaq və gələcək nəsillərə gözəl bir miras qoymaq üçün çalışdığını söyləyib. 

TÜRKSOY-un Gənclər Orkestri Makedoniyadakı ikinci konsertini Ohri Yazı Festivalında verəcək. 

Orkestrin Balkan turu digər ölkələrdəki konsertlərlə avqustun 2-dək davam edəcək.