Litvada Ərəb Mədəniyyəti Günləri başlayır

Sentyabrın 12-16-da Vilnüs, Kaunas, Rukle və Visaginasda “Ərəb mədəniyyəti yaxından da yaxındır” şüarı ilə Ərəb Mədəniyyəti Günləri keçiriləcək. 

Muztv.az Azərtac-a istinadən xəbər verir ki, Liviya, Tunis, Səudiyyə Ərəbistanı, Oman və Fələstindən olan elm və incəsənət xadimləri, diplomatlar, musiqiçilər və rəqqaslar Litvaya gəlirlər.

Ərəb Mədəniyyəti Fondunun başçısı Maritana Larbi bu hadisəyə münasibətini bildirərək deyib:

 “Yoldan keçən bir şəxsdən onun ərəb mədəniyyəti barədə nə bildiyini soruşsaq, çox güman, ondan daha çox xoşagəlməz və çeynənmiş fikirlər eşidərik. Amma o, ərəb fəlsəfəsinin və elminin İntibah dövründə nə kimi rol oynadığını, yaxud orta əsrlərdə Yaxın Şərqdə nə kimi elmi nailiyyətlər əldə edildiyini, İslam xəttatlığının böyüklüyünün sirrini, yaxud xarakteri fəlsəfə, etika və hüquqdan yoğrulmuş İslam memarlığının nə dərəcədə əzəmətli olduğunu çətin ki bilsin. Ərəb Mədəniyyəti Günlərinin tədbirləri zamanı hər bir kəs bu suallara cavab tapa biləcək”.

Litva Ədəbiyyatı və Folkloru İnstitutunda səhnələşdirilmiş ərəb ədəbiyyatı gecəsi keçiriləcək, diskussiya aparılacaq.