Bakıda “İtaliya filmlərinin dadı” festivalı

Bakıda “İtaliya filmlərinin dadı” festivalı
Bakıda “Dünyada İtaliya mətbəxi həftəsi” çərçivəsində “İtaliya filmlərinin dadı” adlı film festivalı keçirilir.

Muztv.az xəbər verir ki, festival çərçivəsində italyan mətbəxinin özəlliklərini özündə ehtiva edən, beynəlxalq mükafatlara layiq görülən İtaliyanın məşhur filmləri nümayiş olunacaq.

Tamaşaçılar festival çərçivəsində “Landmark”da 4 gün ərzində “Çörək və zanbaq”, “İnspektor Montalbano”, “İtaliya ağ-qarada yeyərkən”, “Şərab qayaları”, “Ümumi mətbəx sənəti” və “Kətan üzərində şərab” filmlərini izləyə biləcəklər. Filmlərin nümayişi ödənişsizdir və giriş sərbəstdir.

Xatırladaq ki,  “Dünyada İtaliya mətbəxi həftəsi” hər il İtaliya Xarici İşlər və Beynəlxalq Əməkdaşlıq Nazirliyinin dəstəyi ilə müxtəlif ölkələrdə ölkə mədəniyyətinin təbliği və təşviqi məqsədi ilə təşkil olunur.