Tural və Turan finala çıxa bilmədilər

Tural və Turan finala çıxa bilmədilər
Xəbər verdiyimiz kimi, "Avroviziya 2023" təmsilçilərimiz Tural və Turan Bağmanov qardaşları yarışmanın finalına vəsiqə qazana bilməyib.

Axşam.az xəbər verir ki, 12-ci nömrə altında səhnəyə çıxan əkizlər "Tell me more" mahnısını səsləndiriblər. Tural və Turan məğlubiyyətdən sonra heç bir paylaşım etməyib və fikir bildirməyib.

"Avroviziya"nın Azərbaycan nümayəndə heyətinin musiqi prodüseri Eldar Qasımov qardaşlarla bağlı paylaşım edib. O, əkizlərin şəklini yayımlayaraq onlara təsəlli verməyə çalışıb.

"Sizinlə fəxr edirəm, uşaqlar. Bütün ölkə sizinlə fəxr edir" deyə, Eldar paylaşımında yazıb.

Qeyd edək ki, "Avroviziya"nın ikinci yarımfinalı mayın 11-də, final isə 13-də keçiriləcək.

***

"Dünən çətin yarımfinal oldu. Gözəl mahnıları olan çoxlu böyük sənətçilər və öz yazdığınız mahnı ilə siz. Bəli siz, mahnısında ölkəsini, öz hissləri və hekayəsi ilə təmsil edən bir ilk oldunuz. Onu 200 milyondan çox insan eşitdi. Bu, azərbaycanlı müəlliflər, musiqiçilər, istedadlı insanlar üçün böyük stimuldur. Çalışmaq, inanmaq, çox çalışmaq və yenidən inanmaq lazımdır".


Mtv.az xəbər verir ki, bu sözləri müğənni Eldar Qasımov "Avroviziya" təmsilçilərimiz Tural və Turan Bağmanov qardaşları ilə bağlı paylaşımında yazıb. O bildirib ki, əkizlər müsabiqəyə öz bəstələri ilə qatılan ilk iştirakçı olublar:

"Bu, sadəcə bir müsabiqədir. Lotereya. Və mən fəxr edirəm ki, siz bu qədər qısa və çətin bir yola baxmayaraq, çox şey öyrənə bildiniz, doğma şəhərinizdən birbaşa dünyanın ən böyük səhnəsinə çıxdınız. Bu səyahətin hər anını dəyərləndirdiyinizə və hər anından həzz almağı bacardığınıza heyranam.

Eləcə də, stereotipləri qırdığınız üçün sizə minnətdaram. Bu artıq bir tramplindir. Sayənizdə çox yaxın bir neçə ildə beynəlxalq miqyasda musiqi yazan və onun əhəmiyyətini görə bilən musiqiçilərimizin sayı çox olacaq.

Təkcə yarımfinal gecəsi anlamında deyil, çox daha geniş anlamda siz bu cığırın ilk yolçuları oldunuz. İlk olmaq isə hər zaman çətin olduğu qədər də çox xoş hissdir. Ən yaxşı - sizsiniz! Sizi sevirəm".