Filmimizin “İsmayılı”nı xatırlayaq

Azərbaycan filminin “İsmayıl”ı, 47 illik ömrünün 38 ilini filmə həsr edən əvəzsiz sənətkar Ceyhun Mirzəyev.

Ceyhun Mirzəyev 1946-cı ilin bu günü Ağdamın Abdal-Gülablı kəndində dünyaya göz açıb.

Kinomuzda uşaq rollarının mahir ifaçısı kimi tanınan aktyor, ilk dəfə 9 yaşında “Görüş” filmində rol alıb.

Ona ən böyük uğur gətirən ekran işi isə 12 yaşında çəkildiyi “Ögey ana” filmi olub. “İsmayıl” obrazı ilə qəlblərə taxt quran Mirzəyev azyaşlı olmasına baxmayaraq rolunun öhtəsindən məharətlə gəlir.

Sənətçi, “Koroğlu”, “Dəli Kür”, “Yol əhvalatı”, “Yenilməz batalyon” və digər ekran əsərlərində də rol alıb. 

Ömrünü sənətinə həsr edən Ceyhun bəyin sonunu da təəssüf ki, elə sənəti gətirir. Öz çəkdiyi “Fəryad” filmində yaşadığı sarsıntılar onum qəfil ölümünə səbəb olur. Filmi görmək və onu səsləndirmək Mirzəyevə qismət olmur. O, 47 yaşına 1 ay qalmış gözlərini əbədi yumur. 

İsmayılla başlayan məşhurluq elə İsmayılla da bitir. Dəyərli sənətkarı hörmət və sevgi ilə xatırlayırıq.