“Ömrün Xanım Fəsli” adlı gecəsi keçiriləcək

Xəbər verdiyimiz kimi, İyunun 4-də Heydər Əliyev Sarayında şair-bəstəkar Xanım İsmayılqızının “Ömrün Xanım Fəsli” adlı yaradıcılıq gecəsi keçiriləcək.

Konsertdə bir çox yeniliklər olacaq. Onlardan daha biri bəlli olub. Belə ki, qonaqlar X.İsmayılqızının "Do və başlanır hər şey" adlı kitabını da əldə edə biləcəklər.

"111 nəğmədən ibarət yeni şeirlər kitabımın siqnal nüsxələri gəldi. Bu kitabım "Ömrün Xanım fəsli" nə özəl hazırlanıb. Çox sağ olun, bu hədiyyəyə görə, əziz dostlarım və Azərbaycan Dövlət Tərcümə Mərkəzinin sevimli, dəyərli kollektivi" deyə, X.İsmayılqızı bildirib. 

Xatırladaq ki, gecədə 25-ə yaxın sənət adamı səhnəyə çıxacaq. Onlar Xanım İsmayılqızının məşhur bəstələrini ifa edəcəklər. 

Konsertdə Xalq artistləri Mələkxanım Eyubova, Faiq Ağayev, Nazpəri Dostəliyeva, Röya Ayxan, Əməkdar artistlər Mətanət İsgəndərli və başqaları iştirak edəcəklər. Əməkdar artistlər Fərqanə Qasımova, Abbas Bağırov, müğənnilər Dilarə Kazımova, Elnur Hüseynov və Pərviz Abdullayev ilk dəfə Xanım İsmayılqızının bəstələrini oxuyacaqlar. "Avroviziya" təmsilçilərimizdən olan Elnur Hüseynov konsertdə Xalq artisti Aygün Kazımovanın "İndi sənsiz" mahnısını ifa edəcək.

Onları səhnədə Nərgiz Əliyevanın rəhbərlik etdiyi Royal Strinq Orkestrı və drijor Mustafa Aşurov müşayiət edəcək. 

Konsertin rejissoru Nail Naiboğlu, informasiya dəstəyi isə Axşam.az saytıdır.