“Bakıya qayıtma səbəblərim...”
Bu dəfə Mtv-xəbər olaraq biz qonaq olduq. Respublikanın əməkdar incəsənət xadimi,Azərbaycanın ilk hərbi marşının müəllifi, yüzlərlə möhtəşəm əsərin bəstəkarı Cavanşir Quliyev komandamızı öz studiyasında qarşıladı.
19 il Şimali Kipr Türk Respublikasında yaşayan sənətkar vətənə dönüşündən danışdı.
Cavanşir Quliyev: Bura qayıtmağımın əsas səbəbi yığılıb qalan əsərlərimin taleyi oldu. Çünki mənim yaşadığım yerdə bu əsərlərin ifası üçün nə kollektiv nə də oradakı musiqi həyatı buna imkan vermirdi. Mən anladım ki, iri həcmli əsərlər burada mənsiz ifa olunmayacaq. Həmçinin səhhətimlə bağlı problemlər də yarandı. Həkimlər mənə dedilər ki, çalış qohum-əqrabaya yaxın yerdə yaşa. Sənə lazım ola bilərlər. Azərbaycan Diaspora Komitəsinin sədri Fuad Muradov mən burada tətildə olanda mənimlə görüşdü vı gəlməyimi təkid etdi. Yığışıb gəldim və gəlməyimə də peşman deyiləm. Gələn kimi burda hıyat başladı.
Özü Şəkidə doğulub böyüsə də, Cavanşir bəyin böyük Şuşa sevgisinə bələdik.Bəs Şuşanın Türk Dünyasının Mədəniyyət paytaxtı seçilməsi münasibətilə sənətkarın yeni layihəsi olacaqmı?
Cavanşir Quliyev: Mən bir neçə əsəri planlaşdırmışam. Bunların içərisində poema, opera da ola bilər, xor və solistlərlə bir yerdə. Mənə müharibənin əziyyətlərini əks etdirən bir-iki libretto veriblər. Onları araşdırıram. Yəqin ki, hansısa birinin üzərində duracam və başlayacam.
Bir çox ifaçılar məhz Cavanşir müəllimin bəstələri ilə məşhurluq qazandı desək yanılmarıq. Hazırki Azərbaycan musiqisinin aqibətinə gəldikdə isə…
Cavanşir Quliyev: Dağınıqlıq, yeknəsəklik mövcuddur, müxtəlif üslublar var. Bir tərəfdən bu yaxşıdır, o biri tərəfdən də sanki Azərbaycan musiqisinin nailiyyətləri parçalanıb və bir-birindən aralanıb. Bəlkə də bu cəmiyyətin inkişafının qanunlarından doğan bir vəziyyətdir. Biz onu geri qaytara bilmərik, biz onu dəyişə bilmərik. Bizim gözəl atalar sözümüz var, zər qədrini zərgər bilər. İndi zərgərlər azdır. Səbəbi odur ki, zərgər yəni konsertlərə, səhnələrə, efirlərə keyfiyyətli musiqi seçən adamlar azdır. Onların sayı çoxalmalıdır. Seçim keyfiyyətli aparılmalıdır, keyfiyyəti aşağı olan əsərləri efirə, konsertə və s. buraxmaq olmaz.
Necə olub ki, Cavaşir müəllim bəstələrini etibar etdiyi ifaçıların seçimində belə uğurlu olub?
Cavanşir Quliyev: Bizim peşəmizin bir tərəfi də, ifaçı axtarmaq, seçmək və ifaçını hazırlamaqdır. Təbii ki, istedadının səviyyəsinə, işgüzarlığına görə axtarırıq Burda insani keyfiyyətlər də az rol oynamır. Təbii ki, seçdiklərimizin hamısı məşhur olmadı. Elə bir şey də omur. Amma əksəriyyəti ilə səmərəli işləyə bildik və nəticələr də oldu.
Bəstəkar üçün sevimli ifaçıya gəldikdə isə…
Cavanşir Məmmədov: Bir nəfəri xüsusi olaraq qeyd etməliyəm. Çünki o mənim üçün tək müğənni deyil həm də ölkəmizin və cəmiyyətimizin fəal vətəndaşlarından biri idi. Ölkənin dərdi ilə yaşayan, xalqımızın gələcəyini düşünən ziyalı bir insan idi. O da mənim üçün Akif İslamzadədir.
Ömrünün çox hissəsini işinə həsr edən sənətkara,bəstəkarlıq nə qazandırıb?
Cavanşir Quliyev: Bu gün mənim nəyim varsa, hamısını mənə sənət qazandırdı. Yəni insanlar, tanışlar, dostlarım, çevrəm, müğənnilər, sənətçilər, yazdığım əsərlərim hamısı mənim qazancımdır. Bunu da mənə sənət qazandırdı. Yenidən doğulsam yenə də bu sənətlə maəşğul olaram, belə yaşayaram. Qazandığım hər şeyi sənətə borcluyam.
Ömrünüz uzun, canınız sağlam olsun olsun Cavanşir Quliyev. Yazıb-yaradın! Yazıb ayardın ki, biz də keyfiyyətli və ruha toxunan nəğmələrdən zövq ala bilək!