Xalq artisti gənclərə məsləhət verib

Xalq artisti gənclərə məsləhət verib
"Muğam bizim bitib-tükənməyən sərvətimizdir".

Bu sözləri Xalq artisti Mənsum İbrahimov MTV xəbərə açıqlamasında deyib.


Muğam sənətini laiqincə təmsil edən, gənc muğam ustalarının yetişməsində böyük əmək sərf edən ifaçı gənclərə məsləhət də verib: "Birinci növbədə öz sənətlərini mükəmməl öyrənsinlər. Söhbət xanəndələrdən gedir. Muğamlarımıza bağlansınlar. Tar, kamança ilə oxusunlar. Muğam bizim bitib-tükənməyən sərvətimizdir. Hamımız ona xidmət etməliyik".


Azərbaycanın sevilən muğam ifaçıları sırasında yer alan xanəndənin fikrincə, hər bir ifaçı üçün təhsil və istedad mütləqdir: "İstedad da önəmlidir, amma təhsil vacibdir. Təhsilsiz sənət yoxdur, ancaq yarımçıq ola bilər. Ona görə, hər bir sahədə təhsil mütləqdir.


Opera səhnəsindəki fəaliyyəti ilə bərabər, həm də xalq və bəstəkar mahnıları, muğam ifaçısı olan M.İbrahimov tez-tez səfərlərdə olduğunu söyləyib: "Həm ölkədən kənarda, həm ölkədə oluruq. Bu yaxınlarda Ağdama, Şuşaya getdik. Orda tədbirlər keçirdik. Yenə hazırlaşırıq. Bilirsiniz, mənim "Gəncləşən muğam" layihəm var. Bu günədək 7-ni etmişik, 8-ci mayın 5-də Ağdam muğam mərkəzində olacaq".