Xalq artisti plastik əməliyyatdan qorxur

"30 dəfə əməliyyat keçirmişəm (zarafat edir və gülür). Aktrisa elədir ki, yaşlı obrazları canlandırmasa, kim edəcək? Hər dövrün öz tələbi var. 28 yaşım olanda "Sarıköynəklə Valehin nağılı" filminə dəvət aldım.

Soruşdum ki, kimi canlandıracağam? Dedilər Sarıköynəyi. Cavab verdim ki, 28 yaşım var, 18 yaşlı bir qızı necə canlandırım, rol almayacağam. Mehriban Xanlarovanı tövsiyə etdim. Uğurlu da rol aldı. Həmişə düşünmüşəm ki, kino nə qədər aldadıcı olsa da, aktrisa yaşını nəzərə almalıdır. Teatrda bunu gizlətmək asandır. Kino da isə bu, mümkün deyil".

Bu sözləri Xalq artisti Həmidə Ömərova qonaq olduğu televerilişin birində deyib.

O bildirib ki, plastik əməliyyatdan qorxur: "İndi plastik əməliyyatlar var. Bunun əleyhinə deyiləm. Amma bu əməliyyatlar bizi aktrisalıq sənətində təəccüblənməkdən, təbii hissləri üz cizgilərimizlə göstərməkdən məhrum edir. Ona görə də bacardıqca bunlardan uzaq dururam. O demək deyil ki, mən özümə fikir vermirəm. Hər səhər idmanla məşğul oluram. Həyat yoldaşım deyir ki, piyada gəz. Söyləyirəm ki, mən həmişə ayaqüstəyəm də, ordan-bura, evdən-işə qaçıram. Deyir, yox, piyada gəzmək lazımdır. Hələ ki, plastik əməliyyat etdirməmişəm. Allah qismət etsə, 90 yaşım olsa, fikirləşərəm. Həm də ki, plastik əməliyyatdan qorxuram. Allah bizi necə yaradıbsa, odur. Ona müdaxilə etmək düzgün deyil. Bunun əleyhinə deyiləm, amma sənətimizdə bizə əngəl ola bilər".