Bakıda II Latın Amerikası Filmləri Festivalı keçirilir-foto

Bakıda II Latın Amerikası Filmləri Festivalı keçirilir-foto
Bakıda Argentina səfirliyi tərəfindən II Latın Amerikası Filmləri Festivalı keçirilir.

Mtv.az xəbər verir ki, noyabrın 25-dək davam edəcək festival çərçivəsində Latın Amerikasının müxtəlif ölkələrindən seçilmiş filmlərin nümayişi nəzərdə tutulub.

Oktyabrın 7-də keçirilən açılış mərasiminda Argentinanın Azərbaycandakı səfiri Marianxeles Belluşi çıxış edib, ölkələrimizin adət-ənənələri və mədəni dəyərləri arasında oxşarlıqların olduğunu vurğulayıb. O bildirib ki, bu cür tədbirlər bir ölkənin dilini, musiqisini, adət-ənənələrini və dəyərlərini digər ölkədə paylaşmağa imkan verən ən gözəl vasitələrdəndir.

Argentinalı diplomat, həmçinin əlavə edib ki, bu gün nümayiş etdirilən “Los Corroboradores” sənədli filmi Buenos-Ayresin memarlıq tarixi ilə tamaşaçıları tanış edəcək və onlar üçün Argentinanın bu şəhərini kəşf etmək imkanı yaradacaq.

Sonra Luis Bernardez tərəfindən 2018-ci ildə çəkilmiş “Los Corroboradores” sənədli filmi nümayiş olunub.


Xatırladaq ki, Latın Amerikası Film Festivalı Bakıda ilk dəfə 2018-ci ildə keçirilib.