"20 ilin sədası" adlı konsert olub - FOTO

Heydər Əliyev Mərkəzində “20 ilin sədası” adlı konsert proqramı təqdim olunub.
Bu il yaranmasının 20 ili tamam olan Heydər Əliyev Fondu fəaliyyəti dövründə hər zaman gənc istedadlara, mədəniyyət və incəsənət sahəsinin inkişafına dəstək göstərib, mədəniyyətimizin geniş təbliğinə yönələn layihələr həyata keçirib. Konsert proqramında da məhz bu incəsənət xadimləri, - yaradıcılıqlarında Heydər Əliyev Fondunun iz qoyduğu, dönüş və sıçrayış yaratdığı, dəstək göstərdiyi mədəniyyət və incəsənət xadimləri yer alıb.
Böyük peşəkarlıqla hazırlanmış konsert proqramı bir daha göstərdi ki, Birinci vitse-prezident Mehriban xanım Əliyevanın rəhbərliyi ilə 20 illik fəaliyyətində Ulu Öndər Heydər Əliyevin ideyalarına əsaslanan, elm və təhsil, səhiyyə, sosial və digər sahələrdəki önəmli layihələri ilə mühüm nailiyyətlərə imza atan, ən əsası isə insanların sevgi və inamını qazanan Heydər Əliyev Fondunun gördüyü işlərdə milli-mədəni, mənəvi dəyərlərimizin qorunub saxlanılması, onların təbliği xüsusi önəm kəsb edir.
Fəaliyyətində hər zaman Qarabağa xüsusi həssaslıqla yanaşan Fondun möhtəşəm yubiley konsertinə “Qarabağ” şikəstəsinin səslənməsi ilə yekun vurulub.



































