“Döngə” Xan Şuşinskinin mahnısına yeni nəfəs verdi - VİDEO

Azərbaycanın məşhur “Döngə” rok qrupu mərhum xanəndə Xan Şuşinskinin repertuarına müraciət edib.

Qrup “Qarabağ şikəstəsi” xalq mahnısını yeni versiyada ifa edərək, dinləyicilərə təqdim edib. 

İlk dəfə rok janrında ifa edilən , "Qarabağ şikəstəsi"nə klip də çəkdirib. Əsərin yazılma prosesi qrupa məxsus studiyada baş tutub.  Rejissoru Fərhad Məmmədli olan klipin çəkilişləri isə iki gün ərzində həyata keçirilib.  

Xatırladaq ki, klipdə rok qrupu ilə yanaşı 11 yaşlı xanəndə Murad Nəbizadə də rol alıb. O, xalq mahnısının misralarından birini ifa edib.

Klipin süjetində gənc xanəndə  rok musiqisinə olan sevgisindən və "Döngə" qrupunun yaradıcılığından bəhs edir.  Murad Nəbizadə kiçik yaşlarından muğam məktəbində təhsil almasına baxmayaraq, rok musiqisinə xas olan ruh azadlığını özündə aşılayıb. Qrupun qarşıdan gələn konsertindən təsadüfən xəbər tutan Murad səhnəni onlarla bölüşmək istədiyini ifadə edib.

Yeni klipə gəlincə, qrupun solistləri Nərmin Behbudova və Fərid Məmmədov layihə ilə Azərbaycanın şanlı keçmişi ilə bu günü arasında dinamik körpü qurmağa çalışdıqlarını qeyd ediblər.

Onu da əlavə edək ki, klipdə qrupun imici üzərində iranlı dizayner Faranak Şancan çalışıb.