Məşhur “Ala gözlüm”ün 30 yaşı təntənəli şəkildə qeyd olundu

Böyük sənətkar Akif İslamzadənin illərdir sevərək dinlənilən “Ala gözlüm” kimi tanınan “Neyləyim” mahnısının 30 yaşı tamam olub. Bu münasibətlə böyük bir tədbir təşkil edilib. 

   Böyük sənətkar Akif İslamzadənin illərdir sevərək dinlənilən “Ala gözlüm” kimi tanınan “Neyləyim” mahnısının 30 yaşı tamam olub. Bu münasibətlə böyük bir tədbir təşkil edilib. İllər keçsə də, sözləri Nigar Rəfibəyliyə, musiqisi isə Emin Sabitoğluna aid olan bu ölməz əsər hələ də öz ecazkarlığını qoruya bilib.
   Tədbiri açıq elan edən aparıcı Emin Musəvi hər kəsi ətrafına toplayan “Neyləyim” mahnısından danışaraq qonaqları 1982-ci ildə lentə alınmış Akif İslamzadənin həmin ifasını dinləməyə dəvət edib. Bir sıra incəsənət və mədəniyyət nümayəndələrinin iştirakı ilə davam edən gecədə qonaqlardan ilk olaraq xalq artisti Amalya Pəhahova sözə başlayıb və bu münasibətlə sənətkarı təbrik edib. Məşhurlardan İlqar Muradov, Tünzalə Ağayeva, Sevda Ələkbərzadə, Zamiq Hüseynov, Nazim Pişyari, Elmira Ələkbərzadə 30 ildir öz möhrünü vuran Akif İslamzadə ifasından da söz açıblar. Tünzalə Ağayeva isə bildirib ki, hələ 7 yaşında olarkən “Ala gözlüm”ü ifa edib və elə bu mahnı ilə də səsəinin gözəlliyi hər kəsə məlum olub. Hər kəs Nigar Rəfibəyli, Emin Sabitoğlu və Akif İslamzadə birliyinin bəhrəsi olan əvəzedilməz mahnıdan danışmaqdan yorulmayıb. 
    Səbəbkar Akif İslamzadə də hamının “Ala gözlüm” kimi tanıdığı mahnısı ilə bağlı fikirlərini bölüşüb və o, özündən sonra “Neyləyim”i kimin ifasında bəyəndiyini belə açıqlayıb: “Mən həmin mahnının az sayda ifa edildiyini eşitsəm də, onu deyə bilərəm ki, hər gülün öz ətri olduğu kimi, hər ifanın da öz gözəlliyi var”.

Səbinə Zöhrabqızı
Vüsal Babayev

 

Muz-Tv.az