VIII “START” Gənclərin Beynəlxalq Film Festivalına start verilir

Ölkəmizdə 28, 29, 30 noyabr tarixlərində Gənclər və İdman Nazirliyi, Mədəniyyət və Turizm Nazirliyi və “Cinema” Gənc Kinematoqrafçılar...

 

    Ölkəmizdə 28, 29, 30 noyabr tarixlərində Gənclər və İdman Nazirliyi, Mədəniyyət və Turizm Nazirliyi və “Cinema” Gənc Kinematoqrafçılar Mərkəzinin təşkilatçılığı ilə VIII “START” Gənclərin Beynəlxalq Film Festivalı keçiriləcək. Qafqazın ən böyük qısametrajlı film yarışması olan “START”-a bu il Azərbaycan, Türkiyə, Almaniya, Portuqaliya və s. ölkələrdən filmlər göndərilib. Seçim komissiyası festivalın müsabiqə proqramına animasiya, bədii və sənədli film növlərini əhatə edən 87 film daxil edib. Festivalın direktoru Fehruz Şamıyevin sözlərinə görə, artıq 8-ci ildir keçirilən festival gənclərin istedadlarını nümayiş etdirə bilmələri üçün bir fürsətdir. Daxil edilən filmlər və gələn xarici qonaqların sayına görə builki tədbir daha böyük miqyaslı hesab edilir. Festivalda daha bir yenilik “Yerli” və “Beynəlxalq” yarışma proqramlarının olmasıdır. Fehruz bəyin fikrincə, bununla yerli müəlliflərə daha artıq şans verilir.
    VIII “START” Gənclərin Beynəlxalq Film Festivalı Azərbaycanın ilk qadın kinorejissoru Qəmər Salamzadəyə ithaf olunduğundan beynəlxalq müsabiqənin münsiflər heyətinin üzvləri də ancaq yaradıcı, sənətdə öz sözünü demiş xanımlardan ibarət olacaq.
    Qeyd edək ki, kinosevərlər festivala daxil edilən filmləri noyabrın 28-dən başlayaraq hər gün Nizami Kino mərkəzində izləyə bilər. Giriş sərbəst və pulsuzdur.

 

Sahilə Aslanova
Vüsal Babayev

 

Muz-Tv.az