“VİA Qra” qrupu dağıldı

Bu gün məşhur amerikalı müğənni Tina Törnerin doğum günüdür. 73 yaşlı ulduz 1939-cu il noyabrın 26-da dünyaya gəlib.  

   Bu gün məşhur amerikalı müğənni Tina Törnerin doğum günüdür. 73 yaşlı ulduz 1939-cu il noyabrın 26-da dünyaya gəlib. “Qremmi” mükafatı laureatı olan sənətçi temperamentinə və qeyri-adiliyinə görə “Rok-n-rollun kraliçası” adlandırılır. Tinanın adı dünyanın ən yaxşı 10 rəqqası arasında sadalanır. “Roollinq stoun” jurnalı onu yüzilliyin ən yaxşı müğənnisi kimi qiymətləndirib. Özündən 17 yaş kiçik musiqi prodüseri Ervin Baxla evli olan ulduz dörd oğul anasıdır.
   Populyar rus qrupu "VİA Qra" daha fəaliyyət göstərməyəcək. Bunu qrupun yaradıcısı və rəhbəri Konstantin Meladze bəyan edib: "Son zamanlar qrup haqqında çox şayiələr gəzir. Səhv məlumatlar yayılmasın deyə 1 yanvar 2013-cu il tarixindən artıq "VİA Qra" adlı bir qrupun olmayacağını deyirəm." Qeyd edək ki, "VİA Qra"nın 12 il ərzində dəfələrlə tərkibi dəyişsə də, həmişə öz hit mahnıları və qeyri-adiliyi ilə digər musiqi qruplarından seçilib.
    Amerikalı müğənni Beyons ölkəsində keçən cümə axşamı qeyd olunan “Şükran günü” münasibəti ilə mətbuat az-az da görünən qızı Blue İvy-nin fotolarını yayımlayıb. Məşhur ulduz övladını öpərkən çəkilən şəkli internet saytında paylaşaraq altına: “Ailəm adından sizə xoşbəxt və sağlam bayram arzulayıram” -yazıb. Xatırladaq ki, Beyons və repçi həyat yoldaşı Jay-Z-nin qızları yanvar ayında dünyaya dəlib. 
    Amerikalı aktyor Çarli Şin aktrisa Lindsi Lohanın vergi borcunu ödəməsi üçün 100 min dollarlıq çek yazıb. İki ulduz sentyabrda “Çox qorxulu film 5” filminin çəkilişləri zamanı dost olub. Başı problemlərdən qurtulmayan Lohan Şinə vergi borcu haqqında yaşadığı çətinliklərdən bəhs edib. Şin də keçən həftə bir çek yazaraq Lohanın menecerinə göndərib.
    Müğənni Kristina Agilera yeni “Let there be love” mahnısını münsifi olduğu “The Voice” şousu zamanı təqdim edib. Ulduzu səhnədə yarışmadakı tələbələri Dez Daron və Silviya Yakub müşayət edib. Kristinanın pərəstişkarları müğənninin imicinin yaxşılığa doğru dəyişdiyini qeyd edib.

 

Sahilə Aslanova

 

Muz-Tv.az