Məşhurlar açıqlamaları və yenilikləri ilə bir araya gəldi

Xalq artisti Brilliant Dadaşova yenidən aparıcı kimi ekranlara qayıdır. Türkiyənin TMB telekanalında "Pırlantalı gecələr" adlı müəllif proqramı...

   Xalq artisti Brilliant Dadaşova yenidən aparıcı kimi ekranlara qayıdır. Türkiyənin TMB telekanalında "Pırlantalı gecələr" adlı müəllif proqramı ilə pərəstişkarlarını sevindirməyə hazırlaşan Brilliant xanımın ilk efir günü dekabrın 4-nə təsadüf edəcək. Telekanalın rəsmi internet səhifəsi bu barədə xüsusi anons da yayımlamaqdadır. Hazırda İstanbulda olan Brilliant xanımın verilişinin detalları bütünlüklə açıqlanmır. Xatırladaq ki, sənətkar altı ilə yaxın "Gözəllik dünyanı xilas edəcək" layihəsinin ideya müəllifi və aparıcısı olub. 
   Müğənni Miri Yusifin yeni klipi təqdim olunub.
Sözləri Miri Yusifə və Xətai Əliyə, musiqisi Emin Kərimiyə aid olan “Bir addım” mahnısına Tural Əsədov ekran həyatı verib. Klipin çəkilişləri rəssam Alyona Bandurinanın art-studiyasında aparılıb. Sözügedən ekran əsəri artıq Youtube kanalında yerləşdirilib.
   Müğənni Xuraman Şuşalıdan xəbər var. İfaçı dekabrın14-də Dağıstanın tanınmış müğənnisi Marina Əliyeva ilə eyni səhnəni paylaşacaq. Konsertin təşkilatçısı Samir Xattabın sözlərinə görə, layihə “Narkotikə yox deyək!” adı altında keçiriləcək. Xatırladaq ki, konsertdə digər müğənnilərin də iştirakı gözlənilir.
   Rəqsanə hələ də şəxsi həyatı ilə gündəmdədir. Müğənninin sözlərinə görə, o ailə quracağı şəxslə tədbirlərin birində tanış olub. Əvvəl dost olsalar da, daha sonra bu münasibət sevgiyə çevrilib. İfaçı təmtəraqdan uzaq bir məclis düzənləyəcəyini də vurğulayıb.

Xəyalə Əzizova

 

Muz-Tv.az