“START” başladı

VIII “START” Gənclərin Beynəlxalq Film Festivalının açılış mərasimi keçirilib.  

  VIII “START” Gənclərin Beynəlxalq Film Festivalının açılış mərasimi keçirilib. Nizami Kino Mərkəzində reallaşan tədbirdə aparıcılıq missiyasını Kamilə Babayeva həyata keçirib. O, ilk olaraq gələn qonaqlara festivalın mahiyyəti haqqında məlumat verib. 
  Daha sonra gənclər və idman nazirinin müavini İntiqam Babayev çıxış edərək festivalın İstedadlı və yaradıcı gənclərin 2-ci Respublika Toplantısı çərçivəsində gerçəkləşdiyini bildirib.
  Festivalda iki - “Yerli” və “Beynəlxalq” müsabiqə proqramı olduğundan jüri üzvləri də buna əsasən seçilib. “Yerli” müsabiqədə filmlər 3 nəfərdən ibarət yerli münsiflər heyəti: kinorejissor Elxan Cəfərov, İlqar Safat və “New Baku Post” qəzetinin təsisçisi, jurnalist Tural Əliyev tərəfindən qiymətləndiriləcək. Jüri masasında yer alan kinorejissor Elxan Cəfərov festivalın Azərbaycan kino mədəniyyətinə verdiyi böyük töhfəni xüsusilə vurğulayıb.
  Əməkdar incəsənət xadimi Aydın Kazımzadə isə festivaldakı yeniliklərə münasibət bildirərək bunun gənc rejissorların filmlərini daha yaxşı qiymətləndirməkdə vasitəçi olacağını deyib.
  Qeyd edək ki, müəlliflərin ekran əsərləri “Ən yaxşı bədii film”, “Ən yaxşı sənədli film”, “Ən yaxşı cizgi filmi”, “Ən yaxşı eksperimental film” və “Ən yaxşı film - Qran Pri” nominasiyaları uğrunda yarışacaq.

 

Sahilə Aslanova
Vüsal Babayev

 

Muz-Tv.az