Röya türk mahnısına çəkilən ilk klipini təqdim etdi

Müğənni Röyanın türk mahnısına çəkilən ilk klipi yayımlanıb.  

    Müğənni Röyanın türk mahnısına çəkilən ilk klipi yayımlanıb. “Göndər” adlanan mahnı və video çarxla ifaçının Türkiyə şou-biznesində fəaliyyətinə start verilib. Sözləri və musiqisi sənətçi Soner Sarıkabadayıya məxsus olan əsərin tərkibində müxtəlif versiyaları olan sinql albomu da satışa çıxarılıb. Qeyd edək ki, mahnı və klipin efirlərdə yayımlanmasından əvvəl Türkiyə mətbuatı Röya haqqında geniş xəbərlər yazaraq onu “azərbaycanlı Rihanna” adlandırıb. 
   Dünya şöhrətli ulduz Toni Brekstonun Bakı konserti təxirə salınıb. Səbəb kimi Brekstonun səhhətində problemlər yarandığı bildirilib. Bu barədə müğənninin menecerləri məlumat yayıb. Brekstonun həkimləri onun dekabr ayına nəzərdə tutulan konsert və şou proqramlarının təxirə salınmasını israr edib. Qeyd edək ki, dünya estradasının ulduzu dekabrın 17-18-də Heydər Əliyev Sarayında iki günlük solo konsertlə çıxış etməli idi.
   Azərbaycanın əməkdar artisti Mətanət İsgəndərli yeni klip çəkdirib. Müğənninin “Gəl xoşbəxt olaq” mahnısına çəkdirdiyi klipin rejissor işi Ülviyyə Könül və qardaşı Fuada həvalə olunub. Qeyd edək ki, sənətçi yaxın günlərdə bütün media nümayəndələrini başına toplayaraq yeni klipinin təqdimatını keçirəcək.
  “Avroviziya-2011” mahnı müsabiqəsinin qalibi Nigar Camal “Sevdiyimə nifrət edirəm” mahnısına çəkilən yeni klipini təqdim edib.. Əsərin musiqisi İsa Məlikova, sözləri Paulina Volodkovskiy-Məlikovaya məxsusdur. Video çarxın rejissoru Aleks Lamaxdır. Nigar Camalın obrazı məşhur stilistlər Syama Rəsulova və Fazilə Rəcəbova tərəfindən yaradılıb.

 

Sahilə Aslanova

 

Muz-Tv.az