“Qarabağ bülbülləri” 40 yaşını qeyd etdi

Vaxtilə səsi dünya ölkələrindən gələn “Qarabağ bülbülləri” ansamblının 40 yaşı tamam olub.  

    Vaxtilə səsi dünya ölkələrindən gələn “Qarabağ bülbülləri” ansamblının 40 yaşı tamam olub. Elə bu münasibətlə Rəşid Behbudov adına Mahnı Teatrında konsert keçirilib. Əksər incəsənət nümayəndələrinin iştirakı ilə reallaşan gecədə ilk olaraq qrupun bədii rəhbəri Murad Rzayev sözə başlayıb və konserti açıq elan etib. Daha sonra sözügedən qrupun bu günkü davamçıları “Qarabağ yallısı” ilə qonaqları salamlayıb. Musiqili çıxışdan sonra qonaqlar millət vəkili Aqil Abbasın qrup haqqında səsləndirdiyi fikirləri video çarxdan izləyib. 
   Xalq artisti Arif Babayevi səhnəyə dəvət edən aparıcı bildirib ki, onun qədər davamçısı olan ikinci bir sənətçi tanımır. Professor da qrup haqqında öz xoş fikirlərini səsləndirib. Elnur Zeynalov isə ifası ilə gələn qonaqların könlünü xoş edib. Xalq artisti Nəzakət Teymurova da canlı musiqi ilə yanaşı sözə də yer verib.
   Ömrünü bu ansamblın daim ayaqda durmasına sərf edən qrupun bədii rəhbəri Murad Rzayev də sonda öz fikirlərini bölüşüb. Qarabağsız qalan “Qarabağ bülbülləri”nin heyəti bir neçə dəfə dəyişsə də, ansambl 40 yaşını bax belə tamam edib.

 

Səbinə Zöhrabqızı

Vüsal Babayev

 

Muz- Tv.az