Filipp Kirkorov Timatini ələ saldı

Rusiyalı repçi Timatinin ölkənin ən məşhur məkanlarından birində verdiyi konserti uğursuzluqla başa çatıb.  

     Rusiyalı repçi Timatinin ölkənin ən məşhur məkanlarından birində verdiyi konserti uğursuzluqla başa çatıb. Belə ki, ifaçını dinləməyə gələnlər salonun ancaq yarısını doldura bilib. Aparıcı Kseniya Sobçak repçinin bu uğursuzluğunu rəsmi Twitter hesabında ələ salıb. “Bu da məşhur müharibənin sonu. Kirkorovun isə apreldə 5 Kreml konserti olacaq”,-deyərək yayda Filipp Kirkorovla Timati arasında reallaşan qalmaqala işarə edib. Filipp də öz növbəsində fürsəti əldən verməyərək: “Mənə dedilər ki, Timatinin konsertində izdiham olub. 4 xadimə, 2 gözətçi və 1 jurnalist iştirak edib”,- deyə düşmənini lağa qoyub. 
     Məşhur fransız müğənnisi Patrisiya Kaas 47-ci doğum gününü qeyd edib. Tədbir Moskvada, daha sonra Ukraynanın paytaxtında reallaşıb. Qapalı məkanda davam edən mərasimdə müğənniyə restoran tərəfindən böyük tort hədiyyə edilib. Gecədə xoşagəlməz hadisə də olub. Patrisiya rəqs zamanı yıxılıb və dizini yaralayıb. Tamaşaçılar ifaçının ayağından axan qanı görəndə şoka düşüb. Özünü itirməyən sənətçi kulisə qayıdaraq ayağını müalicə etdirib. Daha sonra səhnəyə qayıdan Patrisiya konsertinə davam edib.
     Müğənni Rita Ori yeni “Radioactive” mahnısını təqdim edib. “Bu, mənim albomumdakı ən sevimli əsərimdir”-deyə 22 yaşlı ifaçı Twitterdə yazıb. Xatırladaq ki, bu yaxınlarda gənc müğənni Londonda reallaşan “Jingle Bell Ball” konsertində iştirak edib.
     On gündən sonra Mayamidə World Music Awards 2012 mükafatlandırma mərasimi reallaşacaq. Beynəlxalq ifaçılar müsabiqəsində Rusiyanı Maks Fadeyevin məşhur qalmaqallı “Serebro” qrupunun təmsil edəcəyi gözlənilir. Bu barədə prodüser özü məlumat verib. ““Serebro” World Music Awards 2012-yə namizəd göstərilib. Dekabrın 20-də qrup “Ən yaxşı dünyəvi kollektiv” adı uğrunda mübarizə aparacaq. Qızlarım “No Doubt”, “U2” və başqa dünya əfsanələri ilə yarışacaq”, -deyə Maks öz sevincini ifadə edib.

 

Sahilə Aslanova

 

Muz-Tv.az