Hande Yenerin son albomu “Kraliça” ilk günündə 80 min sifariş edildi

Türkiyəli müğənni Hande Yenerin son albomu “Kraliça” satışa çıxarılıb.  

   Türkiyəli müğənni Hande Yenerin son albomu “Kraliça” satışa çıxarılıb. İlk günündə 80 min sifariş edilən musiqi toplusunun satış miqdarının daha da artacağı deyilir. İfaçının prodüseri Polad Yağcı bu rəqəmin bu gündən etibarən 2 qat artacağını söyləyib. Bundan başqa, Hande Yener İstanbuldan başlayaraq “Kraliça və dövrü aləm” adlı turnesi çərçivəsində bütün Türkiyəni gəzəcək. 
   Bir çox uğurlu albomlara imza atan “Mor və Ötesi” rok qrupunun son işləri olan “Günəşi beklerken” musiqi toplusu dekabrın 17-də işıq üzü görəcək. Qrup 1995-ci ilin yanvarında turk alternativ rok musiqisinin təmsilçiləri olaraq yaranıb. Kollektivin ilk albomu 1996-cı ildə “Şehir” adı altında təqdim edilib.
   Amerikalı “Maroon 5” qrupu “Daylight” adlı mahnısına çəkilən yeni klipini təqdim edib. Video çarx fanatların iştirakı ilə lentə alındığına görə xüsusilə maraqlı alınıb. Bütün arzu edənlər həyatlarındakı xoşbəxtlik və uğursuzluqlarından bəhs etdikləri qısa videoları qrupa göndərib. Buna görə də klip müasir dövrün çətinliklərini və dəyərini əks etdirən güzgü rolunu oynayıb.
   Məşhur hind musiqiçisi Ravi Şankar 92 yaşında Amerikada vəfat edib. Sənətçi bütün dünyada məşhur olan hind klassik musiqisinin banisidir. Ravi Şankarın sayəsində onun sevimli musiqi aləti olan hind sitarı qərb musiqiçiləri arasında çox məşhur olub. Bundan başqa, mərhum “The Beatles” qrupu ilə də yaxından tanış olub. O, Vudstokdakı rok festivalda çıxış edib, Banqladeşdəki konsertdə aktiv rol alıb. Xatırladaq ki, Ravi Şankar üç dəfə prestijli “Grammy” mükafatına da layiq görülüb.

 

Sahilə Aslanova

 

Muz-Tv.az