Yerli və xarici bəstəkarlar bir araya gəldi

Bəstəkarlar İttifaqının IX Qurultayının 2-ci günündə növbəti konsert keçirilib.  

    Bəstəkarlar İttifaqının IX Qurultayının 2-ci günündə növbəti konsert keçirilib. Tədbirdə nəzərdə tutulduğu kimi məşhur bəstəkarların mahnıları səsləndirilib. Konsertdə qardaş ölkə Türkiyə, Gürcüstan və s.ölkələrdən olan nümayəndələr də yer alıb. İlk olaraq səhnəyə çıxan gənc müğənni Aytac Şıxəlizadə bəstəkar İlham Abdullayevin “Azərbaycan” mahnısını ifa edib.
    Gecədə xalq artisti Eldar Mansurov, eləcə də bəstəkarlar Aygün Səmədzadə və Vüqar Camalzadə də qonaq qismində iştirak edib. Bir-birinin ardınca qəlboxşayan mahnılar təqdim olunan bu qurultayda xalq artisti Ramiz Quliyev tarda ifası ilə gələnlərdə xoş əhval yaradıb.
     Əməkdar artist Elza Seyidcahanın bacısı Rasimə Muradova isə öz ifası ilə gecəyə xüsusi rəng qatıb. Tədbirdə Şəfiqə Axundova, Ramiz Mirişli və digər böyük sənətkarların da əsərləri səsləndirilib. Kameramıza tuş gələn bəstəkar Aygün Səmədzadə konsert haqqında öz təəssüratlarını bizimlə bölüşüb. 
     Daha sonra isə sevimli bəstəkarımız Vüqar Camalzadə keçirilən bu qurultayın əhəmiyyətindən danışıb. Qeyd edək ki, Bəstəkarlar İttifaqının IX Qurultayı dekabrın 18-dək davam edəcək.

 

Sevda Məmmədovva 
Elfaq Lələyev

 

Muz-Tv.az