Anar Nağılbazdan Elşad Xose və Hüseyn Dəryaya sərt ittiham

Ailə üzvləri, eləcə də millət vəkili Qənirə Paşayeva və əməkdar artist Aybəniz Haşımovanın təşəbbüsü ilə bəstəkar Oqtay Kazıminin 80 illik yubileyi ilə bağlı dekabrın 25-də konsert proqramı təşkil olunacaq. 

     Ailə üzvləri, eləcə də millət vəkili Qənirə Paşayeva və əməkdar artist Aybəniz Haşımovanın təşəbbüsü ilə bəstəkar Oqtay Kazıminin 80 illik yubileyi ilə bağlı dekabrın 25-də konsert proqramı təşkil olunacaq. Tədbirdə onun musiqiləri əsasında hazırlanmış “Ağla mənim üçün bu şəhər və Sən” adlı layihənin təqdimatı da reallaşacaq. Eyni zamanda görkəmli bəstəkarın bəzi əsərləri aranjeman olunaraq yeni formada tamaşaçılara təhvil veriləcək. Onu da vurğulayaq ki, həmin musiqilərin sözlərini millət vəkili Qənirə Paşayeva yazıb. Layihənin təqdimatı və gecənin aparıcılıq missiyası isə Aybəniz Haşımovaya həvalə olunub. Əsərlər əməkdar artistlər Aybəniz Haşımova, Gülyanaq Məmmədova, Firuzə İbadova, gənc və istedadlı sənətçilər Ayaz Qasımov və Aynişan Quliyeva tərəfindən ifa edilib. 
    Əməkdar artist Könül Kərimova müğənni Ramal İsrafilov ilə növbəti dəfə duet oxumaq niyyətindədir. Xanım müğənni bildirib ki, bu işbirliyinin də uğurlu olacağına inanır: “Mən öncə Ramalla “Aləm gözəl” mahnısını oxudum. Deyə bilmərəm ki, bu mahnını hansı müğənni yaxşı oxuyub, amma mənim ifamdan sonra mahnı dəbə düşdü. İndi isə Ramalın yeni bəstəsi olan “Dünya Gözəl” mahnısını duet oxumaq barəsində düşünürük. Mənə elə gəlir ki, bizim ifamızdan sonra bu mahnı da “Aləm gözəl” qədər seviləcək”.
    Repçi Hüseyn Dərya şəxsi həyatından danışıb. O, hələlik ailə qurmaq niyyətində olmadığını söyləyib. “Məndən yenidən ailə həyatı qurub-qurmayacağım barədə soruşurlar. Amma hələ ki, evlənmək fikrim yoxdur. Sənətimi davam etdirməliyəm. Mənim üçün ilk növbədə işimdir, daha sonra şəxsi həyat. İnşallah bir zaman gələcək, mənim də ailəm olacaq. Hamı bilir ki, qeyri-sağlam, anormal həyat yaşayıram”, –deyə Hüseyn Dərya əlavə edib. 
    Buna qarşılıq olaraq uzun müddətdir efirlərdə görünməyən məşhur repçi Anar Nağılbaz da şəxsi həyatı ilə gündəmə gələn həmkarlarını sərt ittiham edib. O, bildirib ki, şou aləmində bir çoxu şəxsi həyatı ilə dillər əzbəridir: “Mən heç zaman özəl həyatımla gündəmə gəlməmişəm. Hətta ailə quranda da mediaya icazə verməmişdim. Həmkarlarım Elşad Xose və Hüseyn Dərya isə gündəmə gəlmək üçün şəxsi həyatlarından istifadə edirlər. Mən hər zaman bunun əleyhinə olmuşam.”.
    Gənc və istedadlı müğənni Aygün İsmayılova özəl televiziya kanallarına çıxmamasının səbəbini açıqlayıb: “Hazırda Azərbaycan Televiziya və Radio Verilişləri Qapalı Səhmdar Cəmiyyətinin solistiyəm. Sadəcə buna görə başqa televiziya kanallarına çıxmıram. Amma müğənni kimi yaradıcılığımda yenə də inadkaram”. 
    O, bildirib ki, son vaxtlar şeir də yazır və bəstəkar Pərviz Mahmudov bu şeirlərə mahnılar bəstələyib. A. İsmayılovanın sözlərinə görə, onun bu istedadını da elə P.Mahmudov kəşf edib: “Şairlik etmək fikrində deyiləm. Sadəcə ürəkdən gələn sözləri ipə düzüb inci kimi Pərvizin mahnılarına boyunbağı etmişəm. O, bir gün zəng vurub bəstələdiyi mahnı üçün söz yazmağımı xahiş etdi. Sanki gizli yazdığım şeirlərdən xəbəri varmış. Yazdıqlarımı ona göstərəndən sonra işbirliyimiz başladı. Pərviz bu işdə mənə stimul verdi. Amma mən müğənniyəm və müğənni kimi də qalacam”.

Sahilə Aslanova

 

Muz-Tv.az