Əminə Dilbazinin anım günü keçirildi

Azərbaycan xalq rəqslərinin mahir ifaçısı və quruluşçusu, xalq artisti Əminə Dilbazinin doğum günü münasibətilə dəfn olunduğu Fəxri Xiyabanda anım günü keçirilib.  

    Azərbaycan xalq rəqslərinin mahir ifaçısı və quruluşçusu, xalq artisti Əminə Dilbazinin doğum günü münasibətilə dəfn olunduğu Fəxri Xiyabanda anım günü keçirilib. Əməkdar artist Tahir Eynullayev başda olmaqla onun bir zamanlar rəhbərlik etdiyi Azərbaycan Tibb Universitetinin “Çinar” tələbə rəqs kollektivinin qızları da bu mərasimdə iştirak edib. Onu deyib gələnlər məzarı önünə çiçək-dəstələri qoyub sənətçinin xatirəsini yad edib.
Əminə xanımın tələbəsi olan Tahir Eynullayev öz yaradıcılığında məhz onun əməyinin əvəzsiz olduğunu dilə gətirib. Öz müəllimindən yorulmadan danışan rəqqas Əminə xanımın xatirəsini həmişə əziz tutduğunu da qeyd edib.
     Qeyd edək ki, Əminə Dilbazi 1919-cu ildə dekabrın 26-sı Qazax rayonunda anadan olub. İlk dəfə səhnəyə çıxan xanım rəqqasə Üzeyir Hacıbəyovun bəstələdiyi “Kolxoz çölləri” mahnısını oynayıb. Azərbaycan Dövlət Filarmoniyası Mahnı və Dövlət Rəqs ansamblının solisti 1959-cu ildə Azərbaycan Tibb İnstitutunun yaratdığı “Çinar” tələbə rəqs kollektivinə rəhbərlik edib. Daha sonra isə “Sevinc” qızlar ansamblını yaradıb. 1949-cu ildən Xoreqrafiya məktəbində pedaqoq kimi fəaliyyət göstərən Əminə Dilbazi bir çox filmlərdə rəqslərə quruluş verib. Sənətçinin oynadığı “İnnabı”, “Tərəkəmə”, “Vağzalı-Mirzeyi”, “Turacı”, “Naz eləmə” rəqsləri xüsusilə məşhurdur. 
Xalq artisti aprelin 30-u 2010-cu ildə vəfat edib.

 

Aytən Zöhrabqızı

Rüfət Qarayev

 

Muz-Tv.az