Zülfiyyə Xanbabayeva yeni layihələri ilə heyranlarını sevindirməyə hazırlaşır

Xalq artisti Zülfiyyə Xanbabayeva uzun müddətlik susqunluğunu bu il pozacaq. Müğənninin verdiyi məlumata görə, o, bir neçə yeni mahnı hazırlayıb. 

   Xalq artisti Zülfiyyə Xanbabayeva uzun müddətlik susqunluğunu bu il pozacaq. Müğənninin verdiyi məlumata görə, o, bir neçə yeni mahnı hazırlayıb. “Niyəsə son vaxtlar tənbəlləşmişəm. İndi hamı türk stilli mahnılar oxuyur. Bunu heç sevmirəm. Çalışıram fərqli mahnılar ifa edim. Ona görə də az-az yeniliklər təqdim edirəm. Bu yaxınlarda iki yeni mahnı yazdırmışam. Onlardan biri Polad Bülbüloğlunun ifa etdiyi “Gəl ey səhər” bəstəsidir” -deyən xalq artisti bu mahnıya klip çəkdirməyə hazırlaşdığını da bildirib.

   Yeni ili Ukraynada qeyd edən Elçin Cəfərovun orada çəkdirməyi planlaşdırdığı klip baş tutmayıb. Müğənni açıqlamasında ona mane olan səbəblərdən danışıb. “Klipdə ukraynalı modellə çəkilməliydim.Burdan gedəndə bəzi problemlər çıxdı, beləcə planımız alınmadı. Amma çəkilişi burada reallaşdıracağıq. Bu il albomumdakı bütün mahnılara klip çəkdirəcəm. Növbədə “Susma belə” mahnısı var. Onun ssenarisi fərqli olacaq. Hətta deyə bilərəm ki, tamaşaçılara qısa film təqdim edəcəm” -deyən Elçin Ukraynadan əliboş gəlmədiyini söyləyib. Belə ki, Ukraynada bir dostu müğənniyə bahalı saat hədiyyə edib. Elçin hətta bu il solo konsert də verəcəyini bildirib.

   Çingiz Mustafayev və “Palmas” qrupu “Səbəbim yoxdur” mahnısına klip çəkdirib. Bu günlərdə məşhurların birgə lentə aldıqları ilk ekran əsərlərinin çəkilişləri başa çatıb.  Və onlar artıq əsasında rok musiqi dayanan yeni layihə üzərində işləməyə başlayıb. “Biz öz yaradıcılığımıza və Azərbaycan musiqisinə yenilik qatmaq istəyirik. Söz veririk ki, çoxları şok olacaq” –deyə qrupun prodüseri Zəhra Bədəlbəyli bildirib. Artıq “Palmas” qrupunun ilk solo albomuna daxil edilən mahnılar yazılıb. Onlardan ən səsgətirəninə isə kollektiv klip çəkmək fikrindədir. “Biz bu janrı qrupun bütün üzvlərinin rok sevdiyini bildiyimizə görə seçdik. Mənim efirdə səslənən “Xatirələr” mahnım da bu janrdadır” –deyə Çingiz müsahibəsində vurğulayıb.

   Müğənni Samir Piriyev şou-biznesi tərk etmək niyyətindədir. Bu barədə açıqlama verən ifaçı bildirib ki, istədiyi qədər tanındığı üçün bir çox layihədən imtina edəcək. “Yetəri qədər tanınmışam. İstədiyim yerdəyəm. Əksər layihədə, proqramda artıq özümü görmürəm. Bu sənətə dünən gəlməmişəm ki?! Bəzi layihələrdə şou aləminə yeni qatılan müğənnilər iştirak etməlidir, mən yox. Artıq şou-biznesdən getmək barəsində düşünürəm” ,- deyə o, bildirib.

 

Sahilə Aslanova

 

Muz-Tv.az