Afaq Bəşirqızına səhnəyə çıxmaq qadağan edildi

Bir müddət əvvəl ürəyindən əməliyyat olunan Musiqili Komediya Teatrının aktrisası, xalq artisti Afaq Bəşirqızı səhhəti ilə bağlı səhnədən uzaqlaşıb. 

    Bir müddət əvvəl ürəyindən əməliyyat olunan Musiqili Komediya Teatrının aktrisası, xalq artisti Afaq Bəşirqızı səhhəti ilə bağlı səhnədən uzaqlaşıb. Həkimlər aktrisaya səhnəyə çıxmağı qadağan edib. Belə ki, o, uzun müddət ev şəraitində dincəlməlidir.  Xalq artisti qeyd edib ki, qısamüddətli fasilədən sonra səhnəyə qayıdışı milli bayramımız Novruzda ola bilər.

    Xanəndə Qoçaq Əsgərov yeni xəbərini tamaşaçılarla paylaşıb. Musiqiçi bildirib ki, qatıldığı dünya miqyaslı “Womex” festivalının təşkilatçısı ona şad xəbər çatdırıb. Belə ki, ifası müsabiqədə dəyərləndirilən musiqiçilərin bir qismindən ibarət albom hazırlanıb: “Dəyərləndirilənlər sırasında növbəti dəfə mən də varam. Diskə ifamda “Bayatı-şiraz” muğamı və təsnifləri daxil edilib” –deyə xanəndə vurğulayıb. Xatırladaq ki, “Taste of  East” adlanan topluya Azərbaycan, Belarusiya, Gürcüstan, Moldova, Ukraynadan olan iştirakçıların ifaları daxil edilib. 

    Rəşid Behbudov adına Mahnı Teatrının solisti, əməkdar artist Elza Seyidcahan "Səni araram" adlı yeni mahnısını musiqisevərlərə təqdim edib. Əsərin sözləri millət vəkili Qənirə Paşayevaya, musiqisi isə Sirus Abbasbəyliyə aiddir. Aranjemanın Cavid Cavadoğluya məxsus olduğunu deyən bəstəkar-müğənni Elza Seyidcahan mahnının tamaşaçılar tərəfindən bəyəniləcəyinə ümid edir.

    Bu yaxınlarda yeni evinə köçməyə hazırlaşan Vasif Məhərrəmli hazırda yaşadığı, dəyəri 200 mindən baha olan mənzilini qızına hədiyyə edib. Müğənninin evini dəyişməsinə səbəb isə onun yüksəklik qorxusudur.

   Qeyd edək ki, əvvəlki mənzili 13-cü mərtəbədə olan sənətçinin yeni evi üçüncü mərtəbədədir.

 

 

Sahilə Aslanova

 

Muz-Tv.az