Tina Törner Amerikanı tərk etməyə hazırlaşır

Amerika estradasının əfsanəsi Tina Törner İsveçrə vətəndaşlığı almağa hazırlaşır. 

    Amerika estradasının əfsanəsi Tina Törner İsveçrə vətəndaşlığı almağa hazırlaşır. Ulduz son 20 ildə yaşadığı Kyusnaxt şəhərində qeydiyyatdan keçib. Hazırda müğənninin müraciəti ölkə rəsmiləri tərəfindən araşdırılır. Sənətkarın mətbuat katibi onun yalnız İsveçrəni çox sevdiyinə görə bu addımı atdığını söyləyib. Bundan əlavə, o, ulduzun Amerika vətəndaşlığından imtina etməyə hazırlaşdığını da vurğulayıb.

    Dünya şöhrətli ulduz Ledi Qaqa öz mikrobloqunda bəzi şəxsi fotolarını paylaşıb. Bundan əlavə ulduz Toni Bennetlə birlikdə yeni albom çıxarmağa hazırlaşdığını da bildirib. Yeni musiqi toplusu “Artpop” adlanır və 2013-cü ildə fanatların ixtiyarına veriləcək.

    Nikol Şerzinger “Boomerang” adlı mahnısına çəkilən yeni klipini təqdim edib. Trek müğənninin ikinci albomuna dəstək olaraq çıxarılıb. Video çarx müxtəlif fotosessiyalardan toplanan şəkillərdən hazırlanıb. Klipdə heç bir süjet xətti yoxdur.  Qeyd edək ki, Nikol bir müsahibəsində “Pussycat dolls” qrupunun yenidən birləşəcəyinə ümid etdiyini söyləyib.

    Uzun illərdir musiqidən uzaqlaşan müğənni Castin Timberleyk nəhayət sənətə geri dönüb. O, artıq “Suit and tie” mahnısına çəkilən klipini də təqdim edib. Retro stildə lentə alınan video çarxda karaoke sevərlər də unudulmayıb. Belə ki, ekran əsərində mahnının sözləri də yazılıb. Klip bir gecədə 25 min dəfə izlənilib. Qeyd edək ki, Castin Timberleyk martın 19-da eyni adlı albom da çıxarmağa hazırlaşır.

 

Sahilə Aslanova

 

Muz-Tv.az