Əməkdar artist Yunanıstanda konsert verəcək

Əməkdar artist Tünzalə Ağayeva fevralda Yunanıstanın iki şəhərində verəcəyi solo konsertə hazırlaşır. 

   Əməkdar artist Tünzalə Ağayeva fevralda Yunanıstanın iki şəhərində verəcəyi solo konsertə hazırlaşır. İfaçı bu səfərə səkkiz nəfərdən ibarət ansambl heyətiylə yola düşəcək. Bu barədə açıqlamasında müğənninin prodüseri Yalçın Cabbarov deyib. O bildirib ki, konsert ilk olaraq Yunanıstanın Soloniki, daha sonra isə Santi şəhərində baş tutacaq. Konsertin repertuarı üç hissədən ibarət olacaq. Proqrama Azərbaycan klassik bəstəkar, xalq mahnıları və xanım muğənninin öz bəstələri daxildir.

   Əməkdar artist Firuzə İbadova  haqsızlıqlardan artıq təngə gəldiyini söyləyib: “ Qalmaqal xarakterimə uyğun deyil. Bu günəcən  öz sənətimlə tanınmışam. İndi sənət dostlarım məni görəndə deyirlər ki, ay Firuzə, bu nə işdir? Səni  heç vaxt qalmaqalda görməmişdik. Onlara aydınlaşdıra bilmirəm ki, bu qalmaqala özüm istəmədən düşmüşəm. Özümü şou aləmində görmürəm. Çünki mən şou-biznesə yox, əsl Azərbaycan musiqisinə xidmət edirəm” – deyə müğənni etirazını bildirib.

   Natavan Həbibi ilə Emil Bədəlovun yeni dueti işıq üzü görüb. “Yağış” adlanan mahnı “Youtube” saytında yerləşdirilib. Xeyli baxış sayı toplamış əsəri ifaçıların heyranları maraqla qarşılayıb. Mahnı internetə yerləşdirildiyi andan etibarən izlənmə sayı ilə də diqqət çəkib.

   Repçi Elşad Xosenin həbs olunması haqda şayiələr yayılıb.  Hətta Nəsimi Rayon Polis İdarəsindən bir neçə gün əvvəl idarənin narkotiklərlə mübarizə şöbəsinin əməkdaşlarının onu saxladığı haqqında məlumat verildiyi də iddia edilib. Amma Elşad bu xəbəri təkzib edərək : “Mən həbs olunmamışam. Bunlar şayiədir. Başa düşə bilmirəm, mən kimin üçün bu qədər maraqlıyam? Görürlər bir şey tapmırlar, yalandan çıxarırlar ki, Elşad Xose həbs olunub” – deyə bildirib.

 

Sahilə Aslanova

 

Muz-Tv.az