Milli teatrın yaranmasının 140 illiyi qeyd edildi

Azərbaycan Dövlət Akademik Milli Dram Teatrında peşəkar milli teatrın yaranmasının 140 illiyi qeyd edilib. 

    Azərbaycan Dövlət Akademik Milli Dram Teatrında peşəkar milli teatrın yaranmasının 140 illiyi qeyd edilib. Mərasimdə yaradıcı kollektiv, teatr ictimaiyyətinin nümayəndələri iştirak edib. Tədbirdən əvvəl jurnalistlərin suallarını cavablandıran xalq artisti Amaliya Pənahova  həmkarlarını bu əlamətdar gün münasibəti ilə təbrik edib.

Mərasimdə səhnəyə çıxan xalq artistlərimiz gələn qonaqlar tərəfindən gurultulu alqışlarla qarşılanıb. Daha sonra söz alan teatrın direktoru İsrafil İsrafilov gecənin əhəmiyyətindən danışıb.

   İsrafil bəy teatrın hazırda səhhəti ilə bağlı problemləri olan aktyorlarını da yad etməyi unutmayıb. Bundan əlavə, o, yaxın dövrlərdə incəsənətimizin verdiyi ağır itkilərdən danışaraq vəfat edən sənətkarlarımızın adlarını sadalayıb. Mərasimin rəsmi hissəsindən teatrın 140 il əvvəl olduğu kimi Mirzə Fətəli Axundzadənin eyni adlı əsəri əsasında hazırlanan “Sərgüzəşti-vəziri-xani-Lənkəran” tamaşası nümayiş edilib.

   Qeyd edək ki, martın 1-də Prezident İlham Əliyev “Milli Teatr Günü”-nün təsis olunması və Azərbaycanda peşəkar milli teatrın yaradılmasının 140 illiyi haqda sərəncam imzalayıb. Bu qərarın təsis olunması teatr xadimlərinin peşə bayramının daha geniş miqyasda keçirilməsinə imkan verir.

 

Sahilə Aslanova

Vüsal Həşimov

 

Muz-Tv.az