Mərkəzdə şahmat yarışları keçiriləcək

Heydər Əliyev Mərkəzinin parkında şahmat yarışları keçiriləcək.

Muztv.az xəbər verir ki, yarışlar iyulun 29-u saat 16:00-da reallaşacaq. Qeydiyyatdan keçən hər bir iştirakçı yarış başlamazdan əvvəl turnir məkanında qeydiyyatını təsdiqlətmək məqsədilə şəxsiyyətini və komanda üzvü ilə qohumluq əlaqəsini təsdiq edən sənəd(lər)i hakimlərə təqdim etməlidir.

İştirakçılar komandalara bölünəcək, hər komandanın 2 üzvü olacaq: kapitan (14 yaşınadək gənc) və onun bir ailə üzvü. Ailə üzvü olaraq bacı, qardaş, ana, ata, nənə və ya baba yarışa bilər. Digər ailə üzvləri bir komandada iştirak edə bilməz. -Komandalar qarşılaşarkən kapitan rəqib kapitanla, ailə üzvü isə rəqib komandanın ailə üzvü ilə yarışacaq. Komandanın hər bir üzvünün qazandığı xalların cəmi komandanın xalı kimi hesablanacaq. Ən çox xal toplamış komanda turnirin qalibi elan olunacaq. 

Turnir sürətli şahmat qaydalarına uyğun keçiriləcək və 5 turdan ibarət olacaq. 5 turun yekununda komandaların xalları eyni olarsa, şahmat qaydalarına uyğun olaraq, əlavə göstəricilər nəzərə alınacaq.