Madonna gizli layihəsinin fraqmentlərini yayımlayıb

Populyar müğənni gizli layihəsinin fraqmentlərini rəsmi saytında yayımlayıb. 

   Populyar müğənni gizli layihəsinin fraqmentlərini rəsmi saytında yayımlayıb. Video görüntüyə görə söhbətin nədən getdiyini anlamaq çətindir. Amma ulduzun bu yeni işi üzərində ciddi cəhdlə çalışdığı məlumdur. Adını açıqlamaq istəməyən bir mənbənin məlumatına görə, layihədə yer alması üçün Madonna yaxın dostu, klipmeyker Stiven Klaynı da dəvət edib. Məhz bu şəxs müğənninin bütün turnelerinin səhnə dizaynı ilə məşğul olur. Layihənin tezliklə təqdim ediləcəyi gözlənilir.

   Müğənni Lana Del Rey çoxsaylı heyranlarını yenidən sevindirib. Belə ki, ulduz daha bir klipini təqdim edib. “Chelsea Hotel No.2” adlı mahnı Leonard Koenin klassik əsərinin kaver versiyasıdır. Lana öz stilinə sadiq qalaraq kompozisiyanı retro janrda ifa edib. Xatırladaq ki, ulduzun bundan əvvəl çıxan klipi ilə yenisi arasından yalnız 1 ay fərq var. Qeyd edək ki, bu ilin fevral ayında Lana “Burning desire” mahnısını təqdim etmişdi.

    Tərkibində Şakira, Adam Levin, Aşer və Bleyk Şeltonun olduğu bir qrup məşhur ulduz “The Beatles” qrupunun mahnısını yenidən ifa edib. Adları çəkilən müğənnilər münsif heyəti olduqları amerikan “The Voice” teleşousunun efiri zamanı səhnəyə çıxaraq “Come together” kompozisiyasını səsləndiriblər. Ulduzların bu addımı heyranları tərəfindən alqışlarla qarşılanıb.

    Türkiyəli müğənni Alişan “Səni bir az fazla sevdim” adlı albomuyla musiqi dünyasına geri dönməyə hazırlaşır. 2 il fasilədən sonra təqdim edəcəyi sayca 11-ci musiqi toplusunda “Beyaz gül kırmızı gül” adlı türkünü də səsləndirən ifaçı çox həyəcanlı olduğunu bildirib. Sənətçi: “Hər albom mənim üçün bir başlanğıcdır. Elə siz də yeni Alişan görəcəksiniz” –deyə hisslərini dilə gətirib.

 

Sahilə Aslanova

 

Muz-Tv.az