Bu gün xalq artisti Nəsibə Zeynalovanın doğum günüdür

Uzun illərdir “Qaynana” kimi sevilən, Milli Musiqili Komediya Teatrının inkişafında müstəsna rol oynayan xalq artisti Nəsibə Zeynalovanın doğum günüdür. 

    Uzun illərdir “Qaynana” kimi sevilən, Milli Musiqili Komediya Teatrının inkişafında müstəsna rol oynayan xalq artisti Nəsibə Zeynalovanın doğum günüdür. O, 20 aprel 1916-cı ildə Bakıda dünyaya gəlib. Atası Kərbəlayı Cahangir Azərbaycan milli realist aktyor məktəbinin banisidir. Sənətkarın ən böyük arzusu  ilk və yeganə övladı Nəsibə xanımın onun sənətini davam etdirməsi olub.  Amma təəssüf ki, Cahangir bəyə bunu görmək nəsib olmayıb.

    Yaradıcılığının mayası gülüş və musiqi ilə yoğrulmuş Nəsibə xanım orta məktəbdən rəqqasəlik edib, milli oyun havalarının mürəkkəb və lirik incəliklərinə yiyələnib. 1938-ci ildə yenicə yaranan Azərbaycan Dövlət Musiqili Komediya Teatrının truppasına birinci dərəcəli aktrisa kimi götürülür və elə həmin il Bakı Teatr Məktəbinə daxil olaraq aktyorluq təhsili alıb.
    Aktrisa milli klassik operettalarımızın tamaşalarında Gülpəri, Cahan, Mələk xanım və Kələk xanım kimi rolları ifa edib. Xüsusilə, Cənnət xala, Nargilə, Züleyxa obrazları zəngin ifadə vasitələri, yumorun milliliyi, təbbi reallığı ilə səhnəmizin nadir inciləri sırasında durur.
    Azərbaycan televiziyasında onlarla yumoristik səhnəciklərdə, tele-tamaşalarda, intermediyalarda çıxış edən Nəsibə Zeynalova həmçinin “Azərbaycanfilm"in çoxlu ekran əsərlərinə çəkilib. Kino obrazları içərisində Fatmanisə, Telli, Züleyxa, Cənnət xala, Gülsüm, Əsli xala  rolları daha canlıdır və sənətkara böyük şöhrət gətirib.
    Musiqili teatrımızın inkişafında böyük xidmətlərinə görə Nəsibə xanım 1960-cı ildə Azərbaycan Respublikasının əməkdar artisti, 7 il sonra isə xalq artisti fəxri adına layiq görülüb.    “Hicran”  musiqili komediyasındakı Qızbacı roluna görə Azərbaycan Dövlət Mükafatı Laureatıdır. 1974-cü ildə Rauf Kazımovski onun yaradıcılığı barədə “Aktrisanın təbəssümü” televiziya filmi çəkib.
   Nəsibə Zeynalova 10 mart 2004-cü ildə Bakıda vəfat edib.  Sənətkarın ölümü bir çox teatr və kino sevərlər tərəfindən böyük hüznlə qarşılanıb. Xalq artisti ifa etdiyi rollarla bu gün də xalqın qəlbində yaşayır və dəfələrlə nümayiş etdirilməsinə baxmayaraq tamaşaları eyni maraqla izlənilir. Muz Life ailəsi olaraq böyük sənətkarımıza Allahdan rəhmət diləyirik!

 

Sərvər Mehdiyev

 

Muz-Tv.az