Devid Getta bakılı heyranlarına video müraciət ünvanladı

Məşhur DJ Devid Gettanın dünya turuna Bakı şəhəri də əlavə edilib. Ulduzun konserti mayın 5-də “Expo Center”-də reallaşacaq. 

     Məşhur DJ Devid Gettanın dünya turuna Bakı şəhəri də əlavə edilib. Ulduzun konserti mayın 5-də “Expo Center”-də reallaşacaq. Sənətçi bakılı heyranlarına qeyri-adi səs və işıq effektləri ilə təchiz olunan şou təqdim edəcək. Öz səfərindən əvvəl Devid Getta azərbaycanlı fanatlarına video müraciət də ünvanlayıb. “Salam, Bakı! Bizim ilk görüşümüz mayın 5-də reallaşacaq. Sizi fantastik şou gözləyir” –deyə DJ söyləyib.  Xatırladaq ki, ulduzun konsertinə biletlər aprelin 15-dən satışa çıxarılıb.

     Əməkdar artist Lalə Məmmədova “N-brothers” qrupu ilə duet oxuyacaq.“Üç rəngli bayraq” adlanan vətənpərvərlik mövzusunda mahnının söz və musiqisi Gövhər Həsənzadəyə aiddir. Kompozisiya ulu öndər Heydər Əliyevin 90 illik yubileyinə həsr ediləcək.

     Tanınmış rəqqaslar Fatimə Fətəliyeva və İlham Kərimli Misir səfərindən qayıdıblar. Fatimə  səfər barədə öz təəssüratlarını bölüşərək: “Bildiyiniz kimi biz Misir Mədəniyyət Mərkəzinin təşkil etdiyi 19-26 aprel tarixlərində Qahirədə keçirilən "Milli Folklor və Zərb alətləri" adlı Beynəlxalq Festivala dəvətli idik. İlhamla mən ənənəyə görə bu festivala milli geyimdə qatılmalı və milli rəqslərimizi nümayiş etdirməli idik. Çıxışımızı uğurla yekunlaşdırdıq. Daha sonra biz Misir Dövlət Televiziyasının canlı efirində qonaq olduq və orada ekspromt olaraq Azərbaycan milli rəqsi olan “Naz eləmə” rəqsini nümayiş etdirdik” –söyləyib.  

     Gənc müğənni Çingiz Mustafayev bu il Riqada reallaşacaq Yurmala Musiqi Festivalında ölkəmizi təmsil edəcək. Avqustda keçiriləcək festival üçün sənətçi indidən hazırlıqlara başlayıb. Mərasimdə ölkəmizi layiqincə təmsil edəcəyini deyən Çingiz ciddi şəkildə repertuar seçimi ilə məşğul olur.

 

Sahilə Aslanova

 

Muz-Tv.az