Şou-biznesin iki məşhur siması ailə həyatı qurur

Son bir ildə repertuarına xalq və klassik bəstəkar mahnılarından əlavə, müasir və Türkiyədə aranjeman olunan kompozisiyaları daxil edən gənc müğənni İlahə İbadovanın...

    Son bir ildə repertuarına xalq və klassik bəstəkar mahnılarından əlavə, müasir və Türkiyədə aranjeman olunan kompozisiyaları daxil edən gənc müğənni İlahə İbadovanın növbəti yeniliyi klip çəkilişidir. “Səsin gəlir” adlanan mahnının ekran əsəri yay əhval-ruhiyyəsinə uyğun lentə alınacaq. Çəkilişə sayılı günlər qalsa da, İlahə heyətin kimliyinə bu günlərdə qərar verəcək. Bir neçə rejissordan əməkdaşlıq təklifi alan ifaçının seçimi ən yaxşı ssenarinin üzərində dayanacaq.Qeyd edək ki, proses başa çatandan bir neçə həftə sonra sənətçi klipinə təqdimat keçirməyi düşünür.

    Xalq artisti Aygün Kazımova məclislərin birinə yeni aldığı qırmızı avtomobillə gəlib.Maşın həvəskarı olan ulduzun bu dəfəki avtomobilinin qiyməti 70.000 manat dəyərindədir. Qeyd edək ki, maşın 2013-cü ildə buraxılıb.

    Aprelin 29-da paytaxt restoranlarının birində “Qala qrupu”nun solistlərindən biri Ceyhun Əliyev özünə təmtəraqlı toy edəcək. Toya yerli şou-biznesin əksər simalarının qatılacağı gözlənilir. Şəxsi həyatını mediadan maksimum gizli saxlamağa çalışan müğənni gələcək həyat yoldaşının adını dəvətnamələrə belə yazdırmayıb.Bundan başqa həmin gün  daha bir müğənni subaylığın daşını atacaq. Sözügedən xanım müğənni yaradıcılığını Türkiyə şou-biznesində davam etdirməyi qarşısına məqsəd qoymuş Elyanə Əhmədovadır. Elyanənin sevib-seçdiyi gələcək həyat yoldaşı Azərbaycan əsilli, türk vətəndaşı Mert Arslandır.Qeyd edək ki, Bakıda baş tutacaq qız toyunun davamı iyun ayında İstanbulda təşkil olunacaq. 

    Yerli şou biznesdən daha bir şad xəbər."Toppuş bacı" ləqəbi ilə tanınan əməkdar artist Tünzalə Əliyeva ailə həyatı qurmağa hazırlaşır. Qeyd edək ki aktrisanın dünən nişan mərasimi olub.

 

Səma Ələsgərova

 

Muz-Tv.az