Görkəmli bəstəkar Rauf Hacıyevin doğum günüdür
Görkəmli bəstəkar, SSRİ xalq artisti Rauf Hacıyevin doğum günüdür. Azərbaycan musiqili komediyasının inkişafında mühüm xidmətləri olan Rauf Soltan oğlu Hacıyev
Görkəmli bəstəkar, SSRİ xalq artisti Rauf Hacıyevin doğum günüdür. Azərbaycan musiqili komediyasının inkişafında mühüm xidmətləri olan Rauf Soltan oğlu Hacıyev 1922-ci il mayın 15-də Bakı şəhərində anadan olub.
Rauf bəyin musiqi istedadı erkən yaşlarından özünü büruzə verib. Onun bəstəkarlıq sahəsində formalaşmasında Üzeyir Hacıbəyovun mühüm rolu var. Belə ki, Raufun fortepiano üçün pyeslərini dinlədikdən sonra dahi bəstəkar onun fitri istedadını yüksək qiymətləndirib və il yarım onunla məşğul olduqdan sonra Rauf bir neçə mahnı bəstələyib. Onların arasında xüsusilə "Samur", "Mingəçevir", "Gənclik marşı" ona şöhrət gətirib.
Ilk gənclik məhsulu olan bu əsərlərdən sonra mahnı janrı Rauf Hacıyevin yaradıcılığında aparıcı əhəmiyyət kəsb edib. Xüsusilə bəstəkarın həm ifaçılar, həm də musiqisevərlər arasında "Sevgilim", "Mənim Azərbaycanım", "Lirik mahnı", "Bahar gəlir", "Sevimli şəhər", "Bakı haqqında mahnı", "Leyla", "Neft daşlarında", "Ceyran" mahnıları daha çox populyarlıq qazanıb.
O, 15-ə qədər filmə musiqi yazıb. Onlardan "Əhməd hardadır", "Mən rəqs edəcəyəm", "Bir qalanın sirri", "Kölgələr sürünür", "Qara daşlar" və digər ekran əsərlərini saymaq olar. Rauf Hacıyevin Moskvada tamaşaya qoyulan ilk operettası "Romeo mənim qonşumdur” əsəridir. Sözügedən operetta əvvəl Bakıda "Qonşular" adı ilə yayımlanıb.
R. Hacıyevin axırıncı operettası Üzeyir Hacıbəyovun anadan olmasının 100 illiyinə həsr olunan "Ordan-burdan" əsəridir. Xüsusi olaraq Azərbaycan televiziyası və radio verilişləri şirkətinin sifarişi ilə yazılan və televiziya tamaşası üçün nəzərdə tutulan həmin operetta müəllifin yaradıcılığında musiqili səhnə formalarını mavi ekrana keçirmək baxımından maraqlı təcrübə olub.
Azərbaycan professional musiqisi görkəmli bəstəkarımız Rauf Hacıyevi 1995-ci il sentyabrın 19-da itirib. Sənətkar dünyasını dəyişsə də, onun musiqisi daim yaşayır və xalqımızın estetik baxımdan formalaşmasında, tamaşaçı və dinləyicilərin musiqi zövqünün inkişafında mühüm rol oynayır.
Sahilə Aslanova
Muz-Tv.az