Uitni Hyustonun doğum günüdür

Dini mahnılar ifaçısı Sissi Hyuston 1963-cü il avqustun 9-da ilk qız övladını dünyaya gətirir.  

      Dini mahnılar ifaçısı Sissi Hyuston 1963-cü il avqustun 9-da ilk qız övladını dünyaya gətirir. Bəlkə də Sissi hələ o zaman bilmirdi ki, iki oğul uşağından sonra doğulan bu qız XX əsrin ən gözəl səsi kimi yaddaşlarda qalacaq. Təbii ki, belə bir ailədə anadan olan Uitni uşaq yaşlarından etibarən musiqi ilə maraqlanmağa başlayır. Anasının köməkliyi ilə kilsədə mahnı oxuyan bu qızcığaz zamanla peşəkar səhnədə görünür.
     İllər ötdükcə Uitni özünü model kimi də təsdiq etməyə başlayır və “Glamour”, “Seventeen” kimi dövrünün ən məşhur jurnallarının üzqabığını bəzəyir. Uitni Hyustonun ilk hiti isə 1984-cü ildə Teddy Pendergrassla birgə ifa etdiyi 'Hold me ' adlı mahnı olur. Amma ona populyarlıq qazandıran və bu günədək xatirələrdə qalan bir zamanlar Dolly Partonun ifa etdiyi "I Will Always Love You” mahnısı sənətçini heç kimin fəth edə bilmədiyi zirvələrə qaldırır.
     Həmkarı Bobb Broun ilə ailə quran müğənni 1993-cü ildə Bobbi Kristina adlı qız övladını dünyaya gətirir. 90-ci illərdə sənətinin yüksəliş dövrünü yaşayan Uitni Hyustonun bu zirvədən uzaqlaşmasına səbəb müasir dövrün bəlası adlandırdığımız ağ ölüm olur. Müğənni uzun müddət bununla mübarizə aparsa da, sonda qalib gələ bilmir. Əslində çoxları onun bu problemdən qurtulduğunu düşünürdü. Lakin illər sonra 2012 –ci il 11 fevralda Beverlu Hillsdəki Bevery Hilton otelində ölü tapılan ifaçı bununla bütün fikirləri alt-üst edir. Ölümüdən 1 həftə sonra unudulmaz səsin sahibəsi Uitni Hyuston anadan olduğu Nyu Cersi ştatında dəfn olunur.
    Qeyd edək ki, Uitni Hyuston 1990-cı illərdə “Cangüdən” filmində iştirakından sonra məşhurlaşıb. Sonuncu dəfə 2009-cu ildə müğənni tənqidçilər tərəfindən yüksək qiymətləndirilən “I Look to You” adlı albomunu çıxarıb. İfaçının 170 milyondan artıq musiqi toplusu, singlı və videosu satılıb.

Aysər Həsənli

Muz-Tv.az