Aygün Kazımova təqdimatına jurnalistləri siyahıyla buraxacaq

Bu yaxınlarda məşhur ifaçı və bəstəkar Emin Ağalarovun “Amor” adlı mahnısına çəkdirdiyi klipinin təqdimatı reallaşacaq.  Ulduzun rəsmi saytında verilən məlumata görə...

    Bu yaxınlarda məşhur ifaçı və bəstəkar Emin Ağalarovun “Amor” adlı mahnısına çəkdirdiyi klipinin təqdimatı reallaşacaq.  Ulduzun rəsmi saytında verilən məlumata görə, çəkilişlər Los Ancelesdə həyata keçirilib. Video çarx gələn həftə təntənəli şəkildə Rusiya tamaşaçısının ixtiyarına veriləcək. Dünya premyerası isə yay aylarında olacaq. Klipdə “Miss Kainat -2012” gözəli Olivia Kulpo da rol alıb. Ekran işinin rejissoru bir çox dünyaşöhrətli ulduzlarla əməkdaşlıq edən Kris Simsdir.

    Xalq artisti Aygün Kazımova sonuncu Türkiyə səfəri və layihələri haqqında fikirlərini bölüşüb: “Murat Yeterin orkestri artıq mənim orkestrimdir. Bundan sonra bütün səfərlərimdə, dünya əhəmiyyətli layihələrimdə məni onlar müşayiət edəcəklər. Artıq bütün konsert proqramım hazırdır. Kliplə bağlı işlər də yekunlaşıb. Təqdimat mərasiminə jurnalistlər siyahı ilə buraxılacaqlar. Layihəmizə qərəzli yanaşıb cürbəcür fotoşop şəkilləri ilə təbliğat aparanlar zəhmət çəkib gəlməsinlər. Qapı arxasında qalacaqlar”. Qeyd edək ki, Aygün Kazımova və Snop Doq iyulun 7- də İstanbul "Beşiktaş İnönu Stadion"unda dünya turnesinə start verəcəklər.

    Bəstəkar Ruslan Səfəroğlu əməkdar artist Mətanət İsgəndərli üçün yeni mahnı yazıb. Müğənni açıqlamasında kompozisiyanın onun həyatından bəhs etdiyini söyləyib. “Ruslan mahnını bəstələyəndə bunun yalnız mənim üçün olduğunu deyib. “Yoxsan gözümdə” əsl mənim həyatımdan bəhs edir. Onu göz yaşı içində oxudum. Bir vaxt gələcək hansı hisslər keçirdiyimi açıb danışacağam. Hətta oğlum da qulaq asanda gözləri doldu. Bu mahnı hitə çevriləcək”.

    Heydər Əliyev Sarayının təşkilatçılığı ilə “Uşaqların Beynəlxalq Müdafiəsi Günü”nə həsr olunmuş böyük konsert proqramı keçiriləcək. 25 may 2013-ci il tarixinə nəzərdə tutulan tədbirdə “Asiman” rəqs kollektivinin iştirakı ilə milli və müasir rəqslər, Şaolin və Bədii Gimnastika Federasiyalarını təmsil edən idmançı uşaqların iştirakı ilə rəngarəng çıxışlar, illüziya şousu və bir sıra estrada ulduzlarının iştirakı nəzərdə tutulub. Bundan əlavə, konsertdə uşaqları sürprizlər gözləyir. Balaca qonaqlar Azərbaycanın “Avroviziya” təmsilçiləri Fərid Məmmədov və Eldar Qasımovu böyük səhnədə izləmək imkanı əldə edəcəklər.

   Biletləri şəhərimizin kassalarından əldə etmək olar. Biletlərin qiyməti 5-20 azn arasındadır. Adəti üzrə bu bayram konsertinə də, Sarayın rəhbərliyi tərəfindən kimsəsiz, fiziki qüsurlu, əlil uşaqlar təmənnasız olaraq dəvət olunublar.

 

Sahilə Aslanova

 

Muz-Tv.az