Onlar 35 ildən sonra “Son zəng”i belə qeyd etdilər

Bu gün hər yerdə son zəng çalınır. Artıq 31 mayı bayram kimi qeyd etmək bir adətə çevrilib.

   Bu gün hər yerdə son zəng çalınır. Artıq 31 mayı bayram kimi qeyd etmək bir adətə çevrilib. “Muz Life” komandası olaraq bu dəfə də fərqlənməyə çalışdıq və sizə qeyri-adi hisslər yaşadacaq bir layihə təqdim edirik. Belə ki, Muz Tv yenicə məzun olanların deyil, illər öncə bu həyəcanı yaşayanların xatirələrini ekranlarınıza gətirdik. 

   Bu zəng düz 35 il əvvəl Göyçə mahalının Toxluca kənd orta məktəbinin 1977-78 tədris ilinin məzunları üçün çalındı. Həmin gün məzunlar bilirdilər ki, bu böyük zəngin onları ayırmağa gücü çatmayacaq. Çünki onlar birlikdə oxumağı, birlikdə sevməyi və birlikdə kədərlənməyi öyrənmişdilər.  Bunu 35 ildən sonra reallaşan həmin məktəbin məzun və müəllimlərinin görüşündə açıq-aydın görmək mümkün idi.

   Hər kəs həyəcanla öz yerini alıb tədbirin başlamasını  gözləyirdi və elə ilk olaraq 35 il əvvəl eyni parta arxasında əyləşdikləri sinfin nümayəndəsi Məhəmməd Məmmədov sözə başlayıb. Daha sonra həmin sinfin şagirdlərindən olan Fazil İsmayılov öz növbəsində sözü tədbirin ən qocaman müəlliməsi Ceyran xanıma verib. Növbə ilə hər kəsin öz hisslərini bölüşdüyü tədbirdə musiqili qonaqlar da ifaları ilə səbəbkarları təbrik ediblər. 35 il öncə Son zəngin səsinə kövrələn məzunlar  bu gün mahnı sədaları altında sevinclə rəqs ediblər. 

   Biz də “Muz life” komandasi olaraq bütün məzunların illər sonra da belə nümunəvi görüşlər təşkil etməsini və heç bir zəngin son olmamasını arzulayırıq.

 

Səma Ələsgərova

Səbuhi Əhədəov

Elfaq Lələyev

 

Muz-Tv.az