Görkəmli sənətkar Səyavuş Aslan son mənzilə yola salındı

Xalq artisti, iki gün əvvəl “Şərəf” ordeni ilə təltif olunan, bir çox kino və teatr tamaşalarında unudulmaz obrazlar yaradan sevimli aktyorumuz Səyavuş Aslan 77 yaşında vəfat edib. 

   Xalq artisti, iki gün əvvəl “Şərəf” ordeni ilə təltif olunan, bir çox kino və teatr tamaşalarında unudulmaz obrazlar yaradan sevimli aktyorumuz Səyavuş Aslan 77 yaşında vəfat edib. Uzun sürən xəstəlikdən sonra səhər saat 4 radələrində dünyasını dəyişən sənətkar ölümü ilə bütün xalqını kədərə qərq edib. 

   Səyavuş Aslanla vida mərasimi Akademik Milli Dram Teatrında keçirilib. Xalq artistinin ölümündən hüznlənən və onu son mənzilə yola salmağa gələnlər arasında yaxınları, sevənləri, eləcə də sənət dostları yer alıb.Onlar da öz növbələrində bu gün həyatdan köçən, Azərbaycanın əvəzedilməz sənətkarı Səyavuş Aslanın vəfatından duyduqları dərin hüznü dilə gətiriblər.Tədbirdə ilk olaraq mədəniyyət və turizm nazirinin müavini Ədalət Vəliyev söz alaraq xalqımıza başsağlığı verib.

   Vida zamanı xalq artisti, Akademik Milli Dram Teatrının Bədii Şura üzvü Azərpaşa Nemətov, xalq artisti Şəfiqə Məmmədova dasənətkarla bağlı ürək sözlərini bölüşüblər. Xalq artisti son mənzilə məhz ən çox sevdiyi məkandan yola salınıb və teatr səhnəsindən axırıncı dəfə böyük alqışlarla yüzlərlə insanın arasından II Fəxri Xiyabana aparılıb. Qeyd edək ki, Azərbaycan realist aktyor məktəbinin görkəmli nümayəndələrindən biri Səyavuş Aslanov 1935-ci il sentyabrın 5-də Bakıda dünyaya gəlib. Uzun illər Azərbaycan Dövlət Musiqili Komediya Teatrının aparıcı aktyorlarından olan sənətkar bir müddət həmin teatrın bədii rəhbəri işləyib (1994-1996) və bir çox obrazların mahir ifaçısına çevrilib.

   Səyavuş Aslan 1984-cü ildən Akademik Milli Dram Teatrının aktyoru kimi fəaliyyətə başlayıb. O, televiziya tamaşalarında yüzdən çox obraz ifa edib. Sənətkar teatr və kino yaradıcılığındakı səmərəli fəaliyyətinə görə 1974-cü ildə Azərbaycan Respublikasını əməkdar artisti, 1982-ci ildə xalq artisti fəxri adına layiq görülüb. Aktyor ölümündən 2 gün əvvəl “Şərəf” ordeni ilə təltif edilib.  Sənətkar son mənzilə yola salınsa da, rol aldığı tamaşalar uzun illər onu sevən hər kəsin yaddaşından silinməyəcək. Xalq artistimizə rəhmət, ailəsinə isə səbir diləyirik.

 

Sahilə Aslanova

Ramal Gülməmmədov

 

Muz-Tv.az